Update៖ អគ្គិភ័យឆេះផ្សារបឹងឈូកក្នុងក្រុងបាត់ដំបង អស់តូបលក់ដូរចំនួន១៥០

តូបលក់ទំនិញគ្រប់ប្រភេទចំនួន១៥០តូប របស់អាជីវករស្ថិតនៅជាន់ខាងលើក្នុងផ្សារបឹងឈូក កណ្ដាលក្រុងបាត់ដំបង ទៅបានអណ្ដាតភ្លើងឆាប់ឆេះទាំងស្រុងកាលពីថ្ងៃទី៣ ខែវិច្ឆិកា ឆ្នាំ២០២៤ វេលាម៉ោង១០និង៣០នាទីយប់។

គួរបញ្ជាក់ថា ទីតាំងផ្សារបឹងឈូកនេះស្ថិតក្នុងក្រុម ទី៤២ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង សាងសង់ឡើងអំពីថ្មកម្ពស់២ជាន់ ឆេះជាន់លើអស់តូបចំនួន១៥០តូប ដែលជាន់ខាងលើនេះមានទំហំប្រហែល ៣០មx៦០ម ហើយម្ចាស់ផ្សារមានឈ្មោះ តាន់ មីស្សែល ភេទប្រុស ជាកូនប្រុសរបស់អតីតលោកឧកញ៉ា តាន់ ឈន់។

តាមការបញ្ជាក់ពីសមត្ថកិច្ចជំនាញនៅព្រឹកថ្ងៃទី៤ ខែវិច្ឆិកានេះ បានឱ្យដឹងថា យប់កើតហេតុគឺអាជ្ញាធរខេត្តបានដាក់កម្លាំងយោធាជាច្រើននាក់អោយមកយាមកាមទល់ភ្លឺដើម្បីការពារទ្រព្យសម្បត្តិរបស់អាជីវករ និងងាយស្រួល ក្នុងការត្រួតពិនិត្យ និងបាញ់ទឹកបន្ត ព្រោះរហូតមកទល់ព្រឹកនេះ មានទីតាំងខ្លះមិនទាន់រលត់ភ្លើងនៅឡើយ រីឯសម្ភារខូចខាតមិនទាន់ដឹងនៅឡើយទេ ដោយឡែកមូលហេតុ ក៏កំពុងស្ថិតក្នុងការស្រាវជ្រាវបន្ត។

នៅក្នុងកិច្ចប្រតិបត្តិការនេះ សមត្ថកិច្ចបានចេញរថយន្តពន្លត់អគ្គិភ័យចំនួន១២គ្រឿង ដោយប្រើប្រាស់ទឹកអស់ចំនួន៦០ រថយន្ត។ ហើយនៅព្រឹកនេះដែរទីតាំងកើតហេតុ និងតូបដែលស្ថិតនៅខាងក្រោមទាំងអស់ ត្រូវបានកម្លាំងការពារ និងព័ទ្ធខ្សែសុវត្ថិភាព ដោយមិនទាន់អនុញ្ញាតឱ្យអាជីវករចូលលក់នៅឡើយ ដែលបច្ចុប្បន្នសមត្ថកិច្ចកំពុងធ្វើការស្រាវជ្រាវទៅលើករណីអគ្គិភ័យនេះ៕

អត្ថបទ៖ សោនិយមរ័ត្ន