សន្តិសុខសង្គម

បញ្ជូនជនសង្ស័យ ០៣ នាក់ ទៅតុលាការ ពាក់ព័ន្ធករណីឆក់ ០៦ ករណី

បានផុស

៤ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

កាលពីល្ងាចថ្ងៃទី ០៤ ខែវិច្ឆិកា ឆ្នាំ ២០២៤ កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានកសាងសំណុំរឿងបញ្ជូនខ្លួនជនសង្ស័យចំនួន ០៣ នាក់ ទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធីច្បាប់ ពាក់ព័ន្ធនឹងករណី ឆក់ទ្រព្យសម្បត្តិរបស់ប្រជាពលរដ្ឋចំនួន ០៦ ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជូនខ្លួនជនសង្ស័យពាក់ព័ន្ធករណីឆក់នេះ ធ្វើឡើងបន្ទាប់ពីកម្លាំងនគរបាលជំនាញ នៃស្នងការដ្ឋាននគរបាលរាជធានីភ្នំពេញ ទទួលបានបញ្ជាដឹកនាំដ៏ខ្ពង់ខ្ពស់ពី លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្ដមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកឧត្ដមសេនីយ៍ទោ លី ប៊ុនអេង ស្នងការរងទទួលដឹកនាំការិយាល័យ និងមានការដឹកនាំបញ្ជាផ្ទាល់ដោយ លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល។

កម្លាំងបានស្រាវជ្រាវរហូតឈានដល់ការឃាត់ខ្លួនជនសង្ស័យទាំង ០៣ នាក់ នៅថ្ងៃទី ០២ ខែវិច្ឆិកា ឆ្នាំ ២០២៤ វេលាម៉ោង ០៣ និង ០០ នាទី ចំណុចផ្លូវព្រះមុន្នីរ៉េត សង្កាត់ស្ទឹងមានជ័យ ២ ខណ្ឌមានជ័យ រាជធានីភ្នំពេញ។ ជនសង្ស័យទាំង ០៣ នាក់ រួមមាន ៖ ទី ១.ឈ្មោះ រិន សុវណ្ណារត្ន័ ហៅ គោ អាយុ ១៨ ឆ្នាំ, ទី ២.ឈ្មោះ ភក្តី ដូណា ហៅ ភូ អាយុ ១៨ ឆ្នាំ, ទី ៣.ឈ្មោះ អាត លៃហេង ហៅ ហេង អាយុ ១៨ ឆ្នាំ។

របាយការណ៍របស់សមត្ថកិច្ចបានឲ្យដឹងថា ជនសង្ស័យបានធ្វើសកម្មភាពឆក់ចំនួន ០៦ លើក មាន ០៣ លើក ក្នុងមូលដ្ឋានសង្កាត់ទំនប់ទឹក ខណ្ឌបឹងកេងកង និង ០៣ លើកទៀត ក្នុងមូលដ្ឋានខណ្ឌមានជ័យ ព្រមទាំងដកហូតម៉ូតូធ្វើសកម្មភាពចំនួន ០២ គ្រឿង។

បច្ចុប្បន្ន ជនសង្ស័យ និងវត្ថុតាង ចាប់យកខាងលើ ការិយាល័យបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

អត្ថបទ ៖ សំណាង