រដ្ឋបាលរាជធានីជួសជួលកែលម្អសម្ភារៈក្មេងលេងនៅសួនកុមារវត្តភ្នំ និងសួនកុមារវត្ត​បុទុមវតី​ ដើម្បីសោភណ្ឌភាពក្នុងពិធីបុណ្យអុំទូក

រដ្ឋបាលរាជធានីភ្នំពេញ បាននិងកំពុងមមាញឹកក្នុងការជួសជុលកែលម្អផ្លាស់ប្តូរសម្ភារៈថ្មីកុមារលេង នៅសួនកុមារវត្តភ្នំ និងសួនកុមារមុខវត្តបុទុមវតី ដើម្បីសោភណ្ឌភាព និងបង្កភាពសប្បាយរីករាយដល់កុមារក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ដែលនឹងប្រព្រឹត្តិទៅនៅថ្ងៃទី១៤,១៥,១៦ ខែវិច្ឆិកា ឆ្នាំ២០២៤នេះ។

មន្ត្រីជំនាញរដ្ឋបាលរាជធានីភ្នំពេញ បានឱ្យដឹងនាថ្ងៃទី៤វិច្ឆិកា ឆ្នាំ២០២៤នេះថា ការចុះរៀបចំកែលម្អសម្ភារៈក្មេងលេងនៅសួនកុមារទាំងពីរនេះ ក្រោមការណែនាំរបស់លោក ឃួង ស្រេង អភិបាលរាជធានីភ្នំពេញ ធ្វើយ៉ាងណាឲ្យបានស្អាតនិងមានសោភ័ណ្ឌភាពល្អឡើងវិញសម្រាប់កុមារមកលេងកម្សាន្តក្នុងព្រះរាជពិធីបុណ្យអុំទូក។

មន្ត្រីដដែលបន្ថែមថា សួនកុមារវត្តភ្នំ និងសួនកុមារមុខវត្តបទុមវតីនេះ កន្លងមកសម្ភារៈសម្រាប់ក្មេងលេងមានការ​សឹក​រិចរិលដូចជាបាក់ដុំបង្វិល និងរបករបេីកថ្នាំជាដេីម ចាំបាច់ត្រូវធ្វើការផ្លាស់ប្ដូរថ្មី ដែលសម្ភារៈខ្លះ ក្រុមការងារធ្វេីការជួសជុល ផ្នែកខ្លះត្រូវលាងសម្អាតបាញ់ថ្មាំឡេីងវិញឱ្យបានស្អាត និងមានសោភណ្ឌភាពដូចថ្មី។

មន្ត្រីជំនាញបានបញ្ជាក់ថា ការងារជួសជុលផ្លាស់ប្តូរថ្មីសម្ភារៈកុមារលេង និងកែលម្អរនៅសួនកុមារវត្តភ្នំ និងសួនមុខវត្តបុទុមវតីនេះ បានចាប់អនុវត្តចាប់ពីថ្ងៃទី៣០ ខែតុលា ឆ្នាំ២០២៤ ដែលក្រុមការងារកំពុងខិតខំឱ្យរួចរាល់មុនព្រះរាជពិធីបុណ្យអុំទូក បណ្ដែតប្រទីបសំពះ ព្រះខែ និងអកអំបុក ដែលនឹងប្រព្រឹត្តិទៅនាថ្ងៃ១៤ដល់១៦ វិច្ឆិកាខាងមុខនេះ។

សូមបញ្ជាក់ថា សួនកុមារវត្តភ្នំ និងសួនកុមារមុខវត្តបទុមវតី ត្រូវបានរដ្ឋបាលរាជធានីភ្នំពេញ កសាងឡើងកាលពីអំឡុងឆ្នាំ២០០៤-២០០៥ មកដល់ពេលនេះមានរយៈពេលប្រមាណ២០ឆ្នាំមកហើយ ក្នុងពេលកន្លងមករដ្ឋបាលរាជធានីភ្នំពេញ មានការជួសជុលជាបន្តបន្ទាប់ដែរ តែសម្រាប់ឆ្នាំ២០២៤ នេះជួសជុលលក្ខណៈទ្រុងទ្រាយធំ កន្លែងខ្លះត្រូវរេីចេញ និងដំឡើងថ្មីតែម្តង៕

អត្ថបទ៖ សុខា