នគរបាលរាជធានី បានបញ្ជូនខ្លួនលោក លី សាម៉េត ដល់តុលាការហើយនៅព្រឹកថ្ងៃទី៥វិច្ឆកានេះ

កម្លាំងជំនាញនៃស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី៥ ខែវិច្ឆិកា នេះ បានបញ្ជូនខ្លួនលោក លី សាម៉េត ដល់សាលាដំបូងរាជធានីភ្នំពេញហើយ ដើម្បីអនុវត្តនីតិវិធីច្បាប់។ នេះបើតាមការបញ្ជាក់ពីលោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ នៅមុននេះបន្តិច។

សូមជម្រាបថា តាមការបញ្ជាក់របស់លោកវរសេនីយ៍ឯក សំ វិច្ឆិកា លោក លី សាម៉េត បានចូលសារភាព និងប្រគល់ខ្លួននៅស្នងការដ្ឋាននគរបាលរាជធានីភ្នំពេញតាមរយៈលោកឧត្ដមសេនីយ៍ឯក ជួន ណារឹន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ ដោយបាននាំខ្លួនពីខេត្តព្រះសីហនុ មកកាន់ស្នងការដ្ឋាននគរបាលរាជធានីភ្នំពេញនៅយប់ថ្ងៃទី៤ ខែវិច្ឆិកា យប់មិញនេះដើម្បីសាកសួរ។

ការចូលខ្លួនសារភាពរបស់លោក លី សាម៉េត នេះ បន្ទាប់ពីស្ដេចតេជោ ហ៊ុន សែន ស្នើឲ្យកម្លាំងសមត្ថកិច្ចត្រូវនាំខ្លួនបុគ្គលរូបនេះបញ្ជូនឲ្យតុលាការ ក្រោយលោក លី សាម៉េត ចេញឃ្លីបវីដេអូសារភាពកំហុសរបស់ខ្លួនដែលយកឈ្មោះសម្ដេចតេជោដើរបោកលុយគេជាច្រើន។

ទោះបីចេញវីដេអូសុំទោសយ៉ាងណាក្ដី សម្ដេចតេជោមិនអាចលើកលែងបានទេ ព្រោះនេះជាការធ្វើឲ្យប៉ះពាល់ដល់​កិត្តិយស និងសេចក្ដីថ្លៃថ្នូរបស់សម្ដេចយ៉ាងធ្ងន់ធ្ងរ។ សម្ដេចតេជោ បានសង្កត់ធ្ងន់ថា មិនអាចធ្វើបែបនេះបានឡើយនគរបាលយុត្តិធម៌ត្រូវតែនាំខ្លួន លី សាម៉េត បញ្ជូនទៅតុលាការតាមនីតិវិធី ដោយមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ៕

អត្ថបទ៖ សុខុម