សន្តិសុខសង្គម

២ សប្ដាហ៍ សមត្ថកិច្ចបង្ក្រាបករណីល្បែងស៊ីសងចំនួន ១៩ ករណី

បានផុស

៥ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

ក្នុងរយៈពេល ២ សប្ដាហ៍ មកនេះ គិតចាប់ពីថ្ងៃទី ១៩ ខែតុលា រហូតដល់ថ្ងៃទី ៣ ខែវិច្ឆិកា ឆ្នាំ ២០២៤ ករណីល្បែងស៊ីសងនៅទូទាំងប្រទេស កើនឡើងបន្តិចបន្តួចប៉ុណ្ណោះ ពោលគឺមាន ១៩ ករណី បើធៀបនឹង ២ សប្ដាហ៍ កន្លងទៅ មាន ១០ ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពី លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ បានឲ្យដឹងថា ទោះបីមានការកើនឡើង ៩ ករណី ប៉ុន្តែចំនួននេះបន្តស្ថិតក្នុងអត្រាតិចតួច ខណៈមូលដ្ឋានកើតមានករណីនេះ រួមមាន ខេត្តកំពង់ធំ បាត់ដំបង ក្រចេះ ត្បូងឃ្មុំ កំពត កណ្តាល សៀមរាប និងរាជធានីភ្នំពេញ ដោយអាជ្ញាធរបានអនុវត្តទាំងវិធានការអប់រំ ណែនាំ ធ្វើកិច្ចបញ្ឈប់ និងបញ្ជូនទៅតុលាការ។

លោកបណ្ឌិត បន្ថែមថា «លទ្ធផលនេះបង្ហាញច្បាស់ថា អាជ្ញាធរមូលដ្ឋានទូទាំងប្រទេស ពិតជាសកម្មក្នុងការងារបង្ការ ទប់ស្កាត់ និងបង្ក្រាបបទល្មើស ហើយប្រជាពលរដ្ឋចូលចិត្តលេងល្បែងស៊ីសងក៏មានការយល់ដឹងច្រើន ខ្លះក៏មានការខ្លាចរអាវិធានការសមត្ថកិច្ច ស្របពេលពលរដ្ឋនៅមូលដ្ឋាន រួមទាំងអ្នកសារព័ត៌មាន ក៏ចូលរួមផ្ដល់ដំណឹង និងរាយការណ៍មកសមត្ថកិច្ច»។

សូមបញ្ជាក់ថា រាជរដ្ឋាភិបាល បានដាក់ចេញគោលនយោបាយ ភូមិ-ឃុំ-សង្កាត់ មានសុវត្ថិភាព ដោយក្នុងចំណុចទី ២ នៃគោលនយោបាយនោះ បានរំលេចនូវលក្ខណសម្បត្តិ នៃការគ្មានបទល្មើសល្បែងស៊ីសងខុសច្បាប់គ្រប់ប្រភេទ។ គោលនយោបាយនេះ ក៏មានគោលដៅជំរុញបំផុសចលនាអប់រំមហាជនចូលរួមបង្ការ ទប់ស្កាត់បទល្មើសគ្រប់ប្រភេទផងដែរ៕

អត្ថបទ ៖ ម៉េង