គ្រួសារសព​ជនរងគ្រោះ​ ដោយ​គ្រោះថ្នាក់​ចរាចរណ៍ ៥ នាក់ ទទួល​ថវិកាឧបត្ថម្ភ​ពីអាជ្ញាធរ​ខេត្ត​ក្រចេះ

នៅថ្ងៃទី១១ ខែវិច្ឆិកា ឆ្នាំ២០២៤ លោក ពេជ្រ ប៊ុនធិន អ្នកតំណាងរាស្ត្រមណ្ឌលខេត្តក្រចេះ និងលោក គង់ គឹមនី អភិបាលរងខេត្តក្រចេះ និងជាប្រធានក្រុមការងារខេត្តចុះមូលដ្ឋានស្រុកស្នួល បានចូលរួមលំលែកទុក្ខដល់ក្រុមគ្រួសារសព កុមារា កុមារី ចំនួន ០៥នាក់ ដែលគ្រោះថ្នាក់ដោយចរាចរណ៍ កាលពីយប់ថ្ងៃទី០៨ ខែវិច្ឆិកា ឆ្នាំ២០២៤។

ដោយបាននាំយកថវិកា របស់ លោក នេត្រ ភត្រ្តា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ លោក វ៉ា ថន អភិបាលខេត្តក្រចេះ និងជាអនុប្រធានអចិន្ត្រៃយ៍ នៃក្រុមការងាររាជរដ្ឋាភិបាលចុះមូលដ្ឋានខេត្តក្រចេះ លោក ហួត ឃាងវេង អនុប្រធានក្រុមការងាររាជ រដ្ឋាភិបាលចុះមូលដ្ឋានស្រុកស្នួល និងក្រុមការងារខេត្ត ស្រុក និងថវិការបស់សាខាកាកបាទក្រហមកម្ពុជា ខេត្តក្រចេះ សរុបចំនួន ១០.៣៧០.០០០រៀល និងសម្ភារៈរួមមាន អង្ករ ២៥០kg និងឃីតចំនួន ០៥កញ្ចប់ នៅគេហដ្ឋានសព ស្ថិតនៅភូមិជ្រៃមុំាង ឃុំ ២ធ្នូ ស្រុកស្នួល ខេត្តក្រចេះ។

លោក សាម ណាល់ អភិបាលស្រុកស្នួល បានសម្ដែងការសោកស្ដាយយ៉ាងខ្លាំងចំពោះករណីគ្រោះថ្នាក់ចរាចរណ៍ដែលធ្វើឱ្យមនុស្ស ៥នាក់ បានស្លាប់បាត់បង់ជីវិត។ ពាក់ព័ន្ធនឹងករណីខាងលើនេះផងដែរ ក្នុងនាមគណៈបញ្ជាការឯកភាពស្រុក លោកក៏បានជំរុញដល់ជំនាញអធិការដ្ឋាននគរបាលស្រុកស្នួល ត្រូវពិនិត្យមើលនីតិវិធីហើយនិងពិនិត្យឲ្យបានត្រឹមត្រូវនឹងធ្វើយ៉ាងណា ត្រូវរកឲ្យឃើញចំពោះអ្នកដែលមានកំហុសត្រូវអនុវត្តទៅតាមនីតិវិធីច្បាប់។

គួររំលឹកថា ហេតុការគ្រោះថ្នាក់ដ៏រន្ធត់មួយ​ បានកើត​ឡើងកាលពីវេលាម៉ោង ២០:៣០នាទីថ្ងៃទី០៨ ខែវិច្ឆិកា ឆ្នាំ២០២៤ បង្ក​ឡើងដោយរថយន្ត V1 ម៉ាក FUSO ពណ៍ស លាយ ក្រហម​ ពាក់ស្លាកលេខវៀតណាម​ 92C-157.48 បើកទៅបុកម៉ូតូកំពុងជិៈបញ្ច្រាសទិសគ្នា នៅត្រង់ចំណុចចន្លោះបង្គោលគីឡូម៉ែត្រលេខ ១១-១២ ស្ថិតនៅភូមិ​ច្រាប ឃុំ​ 2
២ធ្នូ ស្រុកស្នួល ខេត្តក្រចេះ លើកំណាត់ផ្លូវជាតិលេខ ៧៤ (ស្នួល-វៀតណាម)៕

ហេតុការណ៍​នេះ​បណ្តាល​ជនរងគ្រោះ​ ៥ នាក់​បាត់បង់ជីវិត ទី១- មានឈ្មោះ​ ឆាន​ ស្រីនិច​ ភេទស្រី​ អាយុ ១៨ឆ្នាំ ជនជាតិខ្មែរ ជាអ្នកបើកបរ ទី២- ឈ្មោះ​ ឆាន​ ស្រីនុត​ ភេទស្រី អាយុ ១៦ឆ្នាំ ជនជាតិខ្មែរ ជាបងប្អូនបង្កើត មានទីលំនៅភូមិក្បាលស្នួល ឃុំស្នួល​ ស្រុកស្នួល​ ខេត្តក្រចេះ​ ស្លាប់នៅកន្លែងកេីតហេតុ។ ទី៣- ឈ្មោះ​ ខេង យៀវ ភេទប្រុស អាយុ ០៨ឆ្នាំ ជនជាតិខ្មែរ ទី៤- ឈ្មោះ​ ខេង ស៉ីនឿន​ ភេទប្រុស អាយុ ០៦ឆ្នាំ ជនជាតិខ្មែរ និងទី៥- ឈ្មោះ​ ខេង ប៉ិច ភេទស្រី អាយុ 04ឆ្នាំ ជនជាតិខ្មែរ ជាបងប្អូនបង្កើត រស់នៅភូមិអូរគ្រៀង​ ឃុំអូរគ្រៀង​ ស្រុកសំបូរ​ ខេត្តក្រចេះ ស្លាប់នៅកន្លែងកេីតហេតុ៕

អត្ថបទ៖ ប្រុញ វិធិន