អគ្គស្នងការនគរបាលជាតិ នឹងពង្រាយកម្លាំងចម្រុះ​ជាង១​ម៉ឺន​៦ពាន់នាក់ ដើម្បីការពារសន្តិសុខសណ្ដាប់​ធ្នាប់ក្នុងពិធីបុណ្យអុំទូក

អគ្គស្នងការដ្ឋាននគរបាលជាតិ នឹងដាក់ពង្រាយកងកម្លាំងចម្រុះសរុបជាង១ម៉ឺន៦ពាន់នាក់ ដើម្បីការពារសន្តិសុខ សុវត្តិភាព និងសណ្តាប់ធ្នាប់ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅពេលខាងមុខ។ នេះបើតាមការបញ្ជាក់ពីលោក ស ថេត អគ្គស្នងការនគរបាលជាតិ នៅក្នុងកិច្ចប្រជុំផ្សព្វផ្សាយផែនការការពារសន្តិសុខ សណ្តាប់ធ្នាប់ ក្នុងពិធីព្រះរាជពិធីបុណ្យអុំទូក កាលពីព្រឹកថ្ងៃទី១២ ខែវិច្ឆិកា ឆ្នាំ២០២៤ នេះនៅនាយកដ្ឋានអង្គរក្ស។

អគ្គស្នងការនគរបាលជាតិ បានបញ្ជាក់ថា កម្លាំងសមត្ថកិច្ចចម្រុះចំនួន ១៦, ៧៥៨នាក់ មកពី១៦ស្ថាប័នអង្គភាព ដូចជា អគ្គស្នងការដ្ឋាននគរបាលជាតិ បញ្ជាការដ្ឋានកងរាជអាវុធហត្ថ បញ្ជាការដ្ឋានអង្គរក្ស បញ្ជាការដ្ឋានជាតិកម្លាំងពិសេសប្រឆាំងភេរវកម្ម បញ្ជាការដ្ឋានកងទ័ពជើងទឹក យោធភូមិភាគពិសេស និងសមត្ថកិច្ចពាក់ព័ន្ធមួយចំនួនទៀត។ លោកបន្ថែមថា កម្លាំងសមត្ថកិច្ចទាំងអស់ នឹងត្រូវបែងចែកទៅតាមទីតាំងប្រារព្ធពិធី និងជុំវិញកន្លែងប្រារព្ធព្រះរាជពិធី ចំណតទូក និងមណ្ឌលស្នាក់នៅរបស់កីឡាករចំណុះទូកតាមរាជធានី-ខេត្ត៕

អត្ថបទ៖ សុភា