រថយន្តដឹកទំនិញពីរគ្រឿង បុកកន្ទុយគ្នាពេលកំពុងចុះចំណោទ ក្រឡាប់ធ្លាក់ផ្លូវ

រថយន្តដឹកទំនិញពីរគ្រឿងចុះចំណោទបុកកន្ទុយគ្នាក្រឡាប់ធ្លាក់ពីលើផ្លូវ កាលពីព្រឹកថ្ងៃទី ១៥ ខែវិច្ឆិកា ឆ្នាំ ២០២៤ ស្ថិតនៅឃុំថ្មដា ស្រុកវាលវែង ខេត្តពោធិ៍សាត់។

លោក នូវ តាល់ ស្នងការរងខេត្តពោធិ៍សាត់ ប្រាប់កម្ពុជាថ្មី នៅរសៀលថ្ងៃទី ១៥ ខែវិច្ឆិកា ឆ្នាំ ២០២៤ នេះថា ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង ៦៖៤០ នាទី​ព្រឹកថ្ងៃទី ១៥ ខែវិច្ឆិកា ដែលជាករណីរថយន្តដឹកទំនិញមួយគ្រឿង បើកបុករថយន្តដឹកដែកពីក្រោយ ពេលកំពុងចុះចំណោទ បណ្ដាលឱ្យរថយន្តដឹកដែកធ្លាក់ផ្លូវ ហើយបណ្ដាលឱ្យតៃកុង​រថយន្ត​២ នាក់ រងរបួស ស្រាល មិនគ្រោះថ្នាក់ធ្ងន់ធ្ងរទេ។

លោកស្នងការរងខេត្តពោធិ៍សាត់ បញ្ជាក់ថា ករណីនេះ​មិនមែនជាករណីគ្រោះថ្នាក់រថយន្ត ដឹកភ្ញៀវ​​ទេសចរណ៍​​ធ្លាក់ផ្លូវ​ដូចការបង្ហោះ​តាមបណ្ដាញ​សង្គមនោះទេ៕