សន្តិសុខសង្គម

ឆ្លងចរន្តម៉ាស៊ីនត្រជាក់ ឆេះបន្ទប់ជាន់ទី ០១ ក្នុងផ្ទះល្វែង ០១ កន្លែង ខូចខាតស្ទើរទាំងស្រុង

បានផុស

៣ ខែ មុន

នៅ

ថ្ងៃអង្គារ ១៩ វិច្ឆិកា ២០២៤

ដោយ

អ៊ិន ពិសី

ឆាបឆេះបន្ទប់ជាន់ទី ០១ ផ្សែងហុយខ្មួលខ្មាញ់ លាយឡំអណ្ដាតភ្លើង ផ្អើលម្ចាស់ផ្ទះរាយការណ៍ជូន មន្ត្រីជំនាញចុះមកពន្លត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គិភ័យនេះដែរបង្កការភ្ញាក់ផ្អើលកាលពីវេលាម៉ោង ១០ និង ៤០ នាទី ព្រឹកថ្ងៃទី ១៩ ខែវិច្ឆិកា ឆ្នាំ ២០២៤ នៅចំណុចផ្ទះល្វែងមួយកន្លែង តាមបណ្ដោយផ្លូវ ១៦៧ សង្កាត់ទួលទំពូងទី ០២ ខណ្ឌចំការមន រាជធានីភ្នំពេញ។

តាមប្រភពព័ត៌មានពីម្ចាស់ផ្ទះបានប្រាប់ឲ្យដឹងថា មុនកើតហេតុ គាត់នៅជាន់ក្រោមកំពុងមើលក្រុមជាងជួសជុលផ្ទះ ខណៈនោះក៏មានផ្សែងហុយខ្មៅចេញពីបន្ទប់ជាន់ទី ០១។ ភ្លាមៗ គាត់រត់ស្ទុះទៅយកបំពង់ពន្លត់ដើម្បីបាញ់ ប៉ុន្តែដោយសារផ្សែងច្រើនមិនអាចពន្លត់បាន គាត់ក៏ប្រញាប់រាយការណ៍ជូនសមត្ថកិច្ចមកអន្តរាគមន៍។

ករណីនេះដែរបង្កឲ្យឆាបឆេះបន្ទប់ជាន់ទី ០១ ចំនួន ០១ ស្ទើរទាំងស្រុង រួមនឹងសម្ភារៈ ហើយបានប្រើប្រាស់រថយន្តពន្លត់មកដល់ទីតាំងចំនួន ០៦ គ្រឿង អស់ទាំងស្រុង។ ក្នុងនោះមានរថយន្តពន្លត់របស់ទីក្រុងកោះពេជ្រ ០២ គ្រឿង និងរថយន្តការិយាល័យបង្ការពន្លត់អគ្គិភ័យរបស់ស្នងការរាជធានីភ្នំពេញ ០៤ គ្រឿង បាញ់រហូតឲ្យរលត់ជាស្ថាពរ។ ចំពោះមូលហេតុសមត្ថកិច្ចបានសន្និដ្ឋានថា បណ្ដាលមកពីឆ្លងចរន្តចេញពីម៉ាស៊ីនត្រជាក់៕

អត្ថបទ ៖ រដ្ឋា