ទំនាស់ពាក្យសម្តី បង្កការផ្ទុះអាវុធរវាងមេប៉ុស្តិ៍រដ្ឋបាល​និងគណៈកម្មកាទូកងស្រុកព្រែកប្រសព្វ

ស្នងការដ្ឋាននគរបាលខេត្តក្រចេះ បាន​កោះហៅលោកវរសេនីយ៍ត្រី វិន ថុន នាយប៉ុស្តិ៍រដ្ឋបាលឃុំឬស្សីកែវ មកធ្វើការសាកសួរពាក់ព័ន្ធនឹងការបាញ់បោះសេរី ក្នុងជម្លោះជាមួយនឹងគណៈកម្មការទូក​ង​ នៅឃុំឬស្សីកែវ​ ស្រុកព្រែកប្រសព្វ​ ខេត្តក្រចេះ​ កាលពីយប់ថ្ងៃទី១៧​ ខែវិច្ឆិកា​ ឆ្នាំ២០២៤​កន្លងទៅ។

យោងតាមប្រភពពីប្រជាពលរដ្ឋ​ ក្នុងមូលដ្ឋានឃុំឬស្សីកែវ​បានឲ្យដឹងថា ករណីដែលនាយប៉ុស្តិ៍រដ្ឋបាលឃុំឬស្សីកែវ ប្រើប្រាស់កាំភ្លើងបាញ់ចំនួន ២ គ្រាប់ គឺដោយសារខឹងជាមួយលោក ហុក រ៉ាមិហ៍ សមាជិកក្រុមប្រឹក្សាឃុំ​ និងជាគណៈកម្មការទូកងវត្តឬស្សីកែវ រួមនិងសមាជិកគណៈកម្មការផ្សេងទៀត​ សង្ស័យជាទំនាស់ផលប្រយោជន៍ រឿង​ចែក​លុយ​អំណោយ និងការចាក់លុយការប្រណាំងទូកកាលពីពេលថ្មីៗនេះផង។

លោក វិន ថុន នាយប៉ុស្តិ៍រដ្ឋបាលឃុំឬស្សីកែវ

ដោយឡែកលោក ហុក រ៉ាមិហ៍ សមាជិកក្រុមប្រឹក្សាឃុំ​ និងជាគណៈកម្មការទូកង វត្តឬស្សីកែវ បានឱ្យកម្ពុជាថ្មីដឹងនៅព្រឹក​ថ្ងៃទី១៩ ខែវិច្ឆិកា នេះថា​ រឿងនេះពាក់ព័ន្ធ​ ដោយសារនៅពេលដែលពិធីបុណ្យអុំទូក​ កម្លាំងប៉ុស្តិ៍រដ្ឋបាលរបស់គាត់​ បានទៅធ្វើការងារសណ្ដាប់ធ្នាប់ជាមួយនឹងគណៈកម្មការទូកង ហើយនៅពេលត្រឡប់មកវិញ​ ក្រុមគណៈកម្មការក៏បានយកថវិកាដែលទទួលបានពីការឧបត្ថម្ភ​ យកមកបូកបញ្ជី ដើម្បីធ្វើការបែងចែកទៅចំណុះទូក ដោយចំណុះទូកម្នាក់ៗទទួលបានថវិកា៣០ម៉ឺនរៀល និងនៅសល់ថវិកា៨លានរៀល។

លោក ហុក រ៉ាមិហ៍ សមាជិកក្រុមប្រឹក្សាឃុំ​ និងជាគណៈកម្មការទូកង វត្តឬស្សីកែវ

លោកឧត្តមសេនីយ៍ត្រី ហន ប៉ូច អ្នកនាំពាក្យស្នងការដ្ឋាននគរបាលខេត្តក្រចេះ​ បានឲ្យដឹងនៅព្រឹកថ្ងៃទី១៩ ខែវិច្ឆិកា នេះ​ថា​ បន្ទាប់ពីនាំខ្លួននាយប៉ុស្ដិ៍នគរបាលរូបនោះ មកស្នងការដ្ឋាននគបាលខេត្ត​ បច្ចុប្បន្នលោកនាយប៉ុស្តិ៍រដ្ឋបាល​ឃុំ​ឬស្សីកែវ កំពុងជាប់អនុវត្តវិន័យរបស់កងកម្លាំង នៅការិយាល័យបុគ្គលិកនៃស្នងការដ្ឋាននគរបាលខេត្តក្រចេះ៕

អត្ថបទ៖ ប្រុញ វិធិន