សមត្ថកិច្ចត្រៀមបង្ហាញមុខក្រុមបងធំ DP Zin នៅរសៀលនេះមុនបញ្ជូនទៅតុលាការពាក់ព័ន្ធករណីកាប់ជនរងគ្រោះស្លាប់ និងរបួសធ្ងន់ម្នាក់

កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ នឹងរៀបចំធ្វើសន្និសីទសារព័ត៌មានបង្ហាញមុខក្រុមជនសង្ស័យបងធំរហស្សនាម DP Zin (ដើមពោធិ៍) ចំនួន១០នាក់ នៅរសៀលថ្ងៃទី២១វិច្ឆិកា នេះ មុនពេលបញ្ជូនទៅសាលាដំបូងរាជធានីភ្នំពេញ ដើម្បីអនុវត្តនីតិវិធីច្បាប់ ពាក់ព័ន្ធករណីកាប់យុវជនរងគ្រោះស្លាប់ម្នាក់ និងរបួសធ្ងន់ម្នាក់។

សូមបញ្ជាក់ថា ជនសង្ស័យរហស្សនាម DP Zin (ដើមពោធិ៍) ត្រូវបានកម្លាំងនគរបាលព្រហ្មទណ្ឌកម្រិលស្រាលនៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខណ្ឌពោធិ៍សែនជ័យ បង្ក្រាបបានកាលពីថ្ងៃទី១៨ ខែវិច្ឆិកា ឆ្នាំ២០២៤ នៅចំណុចទីតាំងបុកប៊ីយ៉ាមួយកន្លែង ស្ថិតក្នុងភូមិ ថ្មគោល២ សង្កាត់ចោមចៅទី២ ខណ្ឌពោធិ៍សែនជ័យ។

នគរបាលបានឱ្យដឹងថា ក្រោយពីឃាត់យកមកសាកសួរ ក្រុមបងធំ DP Zin (ដើមពោធិ៍) នេះបានសារភាពថា ក្រុមពួកគេធ្លាប់ធ្វើសកម្មភាពចំនួន៣លើក មាន៖ ទី១កាលពីថ្ងៃទី១២ ខែតុលា ឆ្នាំ២០២៤ វេលាម៉ោង២និង០០នាទី នៅចំណុចផ្លូវប៉េតុង​ភូមិព្រៃព្រីងខាងត្បូង​ សង្កាត់ចោមចៅទី៣ ខណ្ឌពោធិ៍សែនជ័យ​​ ធ្វើសកម្មភាពកាប់ម៉ូតូ និង​កាប់ជនគ្រោះបណ្ដាលរងរបួស។ លើកទី២ កាលពីថ្ងៃទី១៧ ខែតុលា ឆ្នាំ២០២៤ នៅចំណុចដេប៉ូសាំងតូតាល់ផ្លូវ2004 ក្នុង​សង្កាត់អូរបែកក្អម​ ខណ្ឌសែនសុខ​ ធ្វេីសកម្មភាពកាប់បណ្ដាលជនរងគ្រោះខូចខាតម៉ូតូ និងរងរបួសដៃជាទម្ងន់។ និងលើកទី៣ នៅចំនុច​ផ្លូវបេតុង​ ភូមិ​ចំការឪទ្បឹក​ សង្កាត់កាកាបទី១​ ខណ្ឌពោធិ៍សែនជ័យ​ កាលពី​ថ្ងៃទី១៦ខែតុលា​ ឆ្នាំ២០២៤ វេលាម៉ោង ២៣:២៧​នាទី បណ្តាលអោយជនរងគ្រោះឈ្មោះ ហ្កិត តូណា មុខរបរលក់ទាខ្វៃ ស្លាប់នៅនឹងកន្លែង និងម្នាក់ទៀតរងរបួសធ្ងន់។

នគរបាលបន្តថា ក្នុងរង្វង់ប្រតិបត្តិការបង្ក្រាបនេះ កម្លាំងនគរបាលបានឃាត់ខ្លួនជនសង្ស័យជាក់ស្ដែងសរុប ១៤នាក់ ក្នុងនោះ មាន៤នាក់មិនពាក់ព័ន្ធ ត្រូវបានធ្វើកិច្ចសន្យាអប់រំឱ្យត្រឡប់ទៅផ្ទះវិញ និងបានដកហូតម៉ូតូធ្វើសកម្មភាពសរុប៧​គ្រឿង​ កាំបិតតាំងតោ១ដេីម។

គួររំលឹកផងដែរថា កាលពីវេលាម៉ោង១១និង៥០នាទីយប់ថ្ងៃទី១៦ ខែវិច្ឆិកា ឆ្នាំ២០២៤ ខណៈយុវជនរងគ្រោះ២នាក់កំពុងជិះម៉ូតូម៉ាកហុងដាZoomer-X ១គ្រឿងឌុបគ្នា នៅតាមផ្លូវស្ថិតនៅក្នុងភូមិចំការឪឡឹកទី១ សង្កាត់កាកាបទី១ ខណ្ឌពោធិ៍សែនជ័យ ស្រាប់តែក្រុមបងធំខាងលើមានគ្នាច្រើននាក់ ជិះម៉ូតូច្រើនគ្រឿងដេញកាប់ ជាហេតុធ្វើឲ្យជនរងគ្រោះភ័យ ជិះម៉ូតូរត់ជ្រុលទៅបុកបង្គោលភ្លើងបណ្ដាលឲ្យស្លាប់ម្នាក់ និងរងរបួសធ្ងន់ម្នាក់ បន្ទាប់មកក្រុមទាំងនោះបាននាំគ្នាគេចខ្លួនបាត់អស់៕

អត្ថបទ៖ សំណាង