សន្តិសុខសង្គម

Update ៖ ដុតសំរាមរាលឆេះរោងស្តុកឈើក្នុងរោងចក្រផលិតសាឡុងមួយកន្លែង យ៉ាងសន្ធោសន្ធៅ

បានផុស

៤ ខែ មុន

នៅ

ថ្ងៃសៅរ៍ ២៣ វិច្ឆិកា ២០២៤

ដោយ

អគ្គិភ័យបានឆាបឆេះរោងស្តុកឈើក្នុងរោងចក្រមួយកន្លែង យ៉ាងសន្ធោសន្ធៅ បង្កការភ្ញាក់ផ្អើលដល់កម្មករនាំគ្នាយកបំពង់ពន្លត់អគ្គិភ័យមកបាញ់ តែគ្រប់គ្រងមិនបាន ខ្លាចរាលដាលដល់រោងចក្រ ក៏រាយការណ៍ទៅសមត្ថកិច្ចហៅរថយន្តពន្លត់អគ្គិភ័យមកអន្តរាគមន៍ភ្លាមៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៩ និង ៥០ នាទីព្រឹក ថ្ងៃទី ២៣ ខែវិច្ឆិកា ឆ្នាំ ២០២៤ ក្នុងរោងចក្រផលិតសាឡុងមួយកន្លែង នៅភូមិព្រៃសាលា សង្កាត់កាកាបទី ២ ខណ្ឌពោធិ៍សែនជ័យ។

តាមប្រភពព័ត៌មានបានឱ្យដឹងថា មុនពេលកើតហេតុមានកម្មករម្នាក់ ដុតសំរាមក្បែររោងស្តុកឈើចម្ងាយប្រហែល ៣ ម៉ែត្រ បន្ទាប់មកស្រាប់ខ្យល់បក់ហើររងើកភ្លើងទើរលើឈើ ទើបបង្កជាអណ្ដាតភ្លើងឆាបឆេះយ៉ាងសន្ធោសន្ធៅ។ ភ្លាមនោះ ក្រុមកម្មករ ក៏បាននាំគ្នាយកបំពង់ពន្លត់អគ្គិភ័យជាច្រើនមកបាញ់ពន្លត់ តែមិនអាចគ្រប់គ្រងបាន ដោយស្ថានភាពភ្លើងកាន់តែឆាបឆេះខ្លាំងឡើងៗ ទើបរាយការណ៍ទៅសមត្ថកិច្ចទាក់ទងទៅក្រុមរថយន្តពន្លត់អគ្គិភ័យរថយន្តស្នងការនគរបាលរាជធានីភ្នំពេញមកអន្តរាគមន៍ភ្លាមៗ។

ក្រោយពីទទួលព័ត៌មានភ្លាម រថយន្តពន្លត់អគ្គិភ័យ ក៏ចុះមកដល់ចំណុចកើតហេតុចំនួន ៣ គ្រឿង ដោយប្រើប្រាស់អស់ចំនួន ១ គ្រឿង ទើបគ្រប់គ្រងបាន ១០០ ភាគរយ ដោយមិនមានមនុស្សរងរបួសនោះទេ និងមិនរាលដាលដល់រោងចក្រផងដែរ ខូចខាតឈើសម្រាប់ផលិតសាឡុងមួយចំនួនតែប៉ុណ្ណោះ៕

អត្ថបទ ៖ សុខា