សន្តិសុខសង្គម

អាជ្ញាធរខណ្ឌមានជ័យ ចុះបង្ក្រាបទីតាំងល្បែងស៊ីសងមួយកន្លែង ក្បែរស្ពានអាកាសក្បាលថ្នល់ ឃាត់ខ្លួនមនុស្ស ៩ នាក់

បានផុស

៤ ខែ មុន

នៅ

ថ្ងៃចន្ទ ២៥ វិច្ឆិកា ២០២៤

ដោយ

ក្រោយមានការសំណូមពរពីប្រជាពលរដ្ឋពីបញ្ហាទីតាំងមួយកន្លែងដែលបង្កប់ដោយល្បែងស៊ីសងគ្រប់ប្រភេទ អាជ្ញាធរខណ្ឌមានជ័យ បានចុះបង្ក្រាបជាក់ស្ដែងតែម្ដង ដោយដកហូតវត្ថុតាងមួយចំនួនទូហ្គេមបាញ់ត្រី និងឃាត់ខ្លួនមនុស្សមនុស្សចំនួន ៩ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះធ្វើឡើងកាលពីវេលាម៉ោង ១៨ និង ៣០ នាទី ល្ងាចថ្ងៃទី ២៤ ខែវិច្ឆិកា ឆ្នាំ ២០២៤ ដោយកម្លាំងគណៈបញ្ជាការឯកភាពខណ្ឌមានជ័យ បានចុះត្រួតពិនិត្យ និងអនុវត្តវិធានការរដ្ឋបាល ទីតាំងលួចបើកបង្កប់ល្បែងស៊ីសងខុសច្បាប់ ស្ថិតនៅចំណុចជិតចំណតរថយន្តជាន់ផ្ទាល់ដីអគារខុនដូរ R & F (ច្រកទី ១) ភូមិព្រែកតានូ សង្កាត់ចាក់អង្រែលើ ខណ្ឌមានជ័យ។

តាមប្រភពព័ត៌មានបានឲ្យដឹងថា ប្រតិបត្តិការនេះបានធ្វើឡើងបន្ទាប់ពីមានការសំណូមពរពីប្រជាពលរដ្ឋ ក៏ដូចជាបណ្ដាញសង្គម បានបង្ហោះជាសាធារណៈពីបញ្ហាទីតាំងដែលបើកល្បែងស៊ីសងគ្រប់ប្រភេទ និងធ្វើឲ្យបាត់បង់សណ្ដាប់ធ្នាប់សន្តិសុខសុវត្ថិភាព។ ក្រោយទទួលបានដំណឹងនេះ កម្លាំងគណៈបញ្ជាការឯកភាពខណ្ឌមានជ័យ ដឹកនាំផ្ទាល់ពី លោក សេង គន្ធ អភិបាលខណ្ឌមានជ័យ ចុះឆ្មក់បង្ក្រាបជាក់ស្ដែងតែម្ដង។

ក្នុងរង្វង់ប្រតិបត្តិការនេះអាជ្ញាធរបានដកហូតវត្ថុតាង ៖ ទូហ្គេមបាញ់ត្រី ១ គ្រឿង , តុបៀរ ៤ , កុំព្យូទ័រ ៣, និងសម្ភារៈកៅអីមួយចំនួនទៀត ត្រូវបានចាប់យកមករក្សាទុកនៅសាលាខណ្ឌ។ ដោយឡែកចំពោះទីតាំងវិញ ត្រូវបានអាជ្ញាធរបិទទ្វារចាក់សោជាបណ្ដោះអាសន្ន។

បច្ចុប្បន្នទាំងបុគ្គលិករបស់ទីតាំងល្បែងស៊ីសង និងអ្នកចូលលេង(ភ្ញៀវ) សរុប ៩ នាក់ ត្រូវបានឃាត់ខ្លួនបញ្ជូនទៅអធិការនគរបាលខណ្ឌមានជ័យ ដើម្បីចាត់ការតាមនីតិវិធី៕

អត្ថបទ ៖ សុភា