សន្តិសុខសង្គម

រកឃើញសពបុរសជាអ្នកដឹកជញ្ជូនអាហារអនឡាញម្នាក់ ដែលលោតទឹក កាលពី ២ ថ្ងៃមុន ហើយ

បានផុស

៤ ខែ មុន

នៅ

ថ្ងៃអង្គារ ២៦ វិច្ឆិកា ២០២៤

ដោយ

សពបុរសជាអ្នកដឹកជញ្ជូនអាហារអនឡាញ ដែលមកលោតទឹកលើស្ពានជ្រោយចង្វារ កាលពី ២ ថ្ងៃមុន ត្រូវបានប្រទះឃើញហើយ កាលពីល្ងាចថ្ងៃទី ២៥ ខែវិច្ឆិកា ឆ្នាំ ២០២៤ ចំណុចមុខកោះពេជ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីក្រុមគ្រួសារបានឱ្យដឹងថា សពឈ្មោះ ម៉ី រតនៈ អាយុ ២៤ ឆ្នាំ មុខរបរអ្នកដឹកជញ្ជូនអាហារ មានអាស័យដ្ឋានផ្ទះលេខ ៣៩៥ ផ្លូវលំ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

ប្រភពដដែលបានបន្តថា បន្ទាប់ពីទទួលដំណឹងថាជនរងគ្រោះបានមកលោតទឹកនៅស្ពានជ្រោយចង្វារ ដោយបន្សល់ទុកបណ្ដាំចុងក្រោយដែលកូនរបស់គាត់សរសេរទុកឲ្យក្រុមគ្រួសារបានដឹង គាត់បានជួលទូកនេសាទស្វែងរកសពអស់រយៈពេល ២ យប់ ២ ថ្ងៃ មកហើយ លុះដល់ថ្ងៃទី ២៥ ខែវិច្ឆិកា ឆ្នាំ ២០២៤ វេលាម៉ោង ៤ រសៀល ក៏ផុសសាកសពបុរសខាងលើចេញពីក្នុងទឹក នៅកណ្ដាលទន្លេ ត្រង់ចំណុចមុខកោះពេជ្រ និងបន្ទាប់មកបានយកខ្សែចងសពអូសតាមទូកមកក្រោមស្ពានជ្រោយចង្វារ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដើម្បីទំនាក់ទំនងទៅសមត្ថកិច្ចមូលដ្ឋាន និងសមត្ថកិច្ចជំនាញ ធ្វើកោសល្យវិច័យ។

គួរបញ្ជាក់ថា កាលពីថ្ងៃទី ២៣ ខែវិច្ឆិកា ឆ្នាំ ២០២៤ ជនរងគ្រោះខាងលើបានជិះម៉ូតូមួយគ្រឿង ម៉ាកហុងដាឌ្រីមសេ ១២៥ ពាក់ផ្លាកលេខ ភ្នំពេញ 1IJ 1196 ដឹកកេសដាក់ម្ហូបអាហារ food panda មកឈប់នៅលើស្ពានជ្រោយចង្វារអស់រយៈពេលប្រមាណជាង ១ ម៉ោង ដោយទឹកមុខស្រងូតស្រងាត់។ នៅយប់នោះ ពុំមាននរណាម្នាក់ចាប់អារម្មណ៍ឡើយ លុះក្រោយមកគេឃើញបុរសរូបនោះបានតោងបង្កាន់ដៃស្ពានលោតចុះទៅក្នុងទន្លេសម្លាប់ខ្លួនបន្សល់ទុកម៉ូតូ ១ គ្រឿង និងលិខិតបណ្ដាំចុងក្រោយ ព្រមទាំងអត្តសញ្ញាណប័ណ្ណ។

លិខិតបណ្ដាំចុងក្រោយនោះបានសរសេរថា «ឱ្យកូនសុំទោសផងណាម៉ាក់ដែលកូនសម្រេចចិត្តបែបនេះ និងសុំទោសម៉ាក់ដែលកូនមិនអាចមើលថែម៉ាក់បានរស់ស្រួលដូចម៉ាក់គេ។ បងដា ជួយមើលថែម៉ាក់ផង។ ឱ្យបងសុំទោសផងប្រពន្ធរបស់ប្ដី ឱ្យប្ដីសុំទោសដែលមិនអាចមើលថែរក្សាអូនតាមពាក្យសន្យាជាមួយអូន ឱ្យបងសុំទោស។ បណ្ដាំចុងក្រោយរបស់បងជូនអូន. បើសិនជារកសាកសពបងឃើញ សូមអូនប្រគល់ជូនម៉ាក់ ដើម្បីឱ្យម៉ាក់យកទៅធ្វើបុណ្យចុះ បងសុំទោសអូនជាលើកចុងក្រោយ ហើយម៉ូតូនេះ ក៏បងសុំប្រគល់ឱ្យម៉ាក់ដែរបានអត់អូន? ហើយនឹងលុយតិចតួចជូនម៉ាក់ផងណាអូន (បងសុំអរគុណអូនហើយណាបងស្រឡាញ់អូន»។

បន្ទាប់ពីសមត្ថកិច្ចជំនាញធ្វើកោសល្យវិច័យសពរួច បានបញ្ជាក់ និងសន្និដ្ឋានថា សាកសពបុរសខាងលើពិតជាស្លាប់ដោយលង់ទឹកពិតប្រាកដមែន ដោយមានការអះអាងពីក្រុមគ្រួសារថា សពនោះគឺជាកូនប្រុសរបស់គាត់ពិតមែនដែលឃើញពាក់អាវក្រុមហ៊ុន food panda។ សមត្ថកិច្ចជំនាញ បានរៀបចំឯកសារប្រគល់សាកសពជូនក្រុមគ្រួសារយកធ្វើបុណ្យទៅតាមប្រពៃណី៕

អត្ថបទ ៖ សំណាង