អាជីវករលក់ដូរក្នុងចំណតឡូរី ភ្នំបាណន់ ថ្ងូរស្ងាត់ភ្ញៀវ ឯតូបជួលក៏ថ្លៃ

ក្នុងរយៈប៉ុន្មានខែចុងក្រោយនេះ ក្រុមអាជីវករដែលលក់ដូរចំណីអាហារនៅក្នុងចំណតឡូរី ក្បែរជើងភ្នំបាណន់ បាននាំគ្នារអ៊ូដែលខ្លះស្ទើរតែរើឆ័ត្រលែងចង់លក់ទៅហើយ ដោយសារតែស្ងាត់ភ្ញៀវទេសចរណ៍ទៅជិះឡូរីកំសាន្ត ឯតម្លៃជួលកន្លែងលក់ក៏ថ្លៃ។

ស្ត្រីម្នាក់ដែលជាអាជីវកររស់នៅភូមិវត្តគរ សង្កាត់វត្តគរ ហើយបានទៅជួលកន្លែងលក់ដូរនៅក្នុងចំណតឡូរីនោះ បានរៀបរាប់ថា ទីតាំងដែលអ្នកស្រីជួលគឺស្ថិតនៅក្នុងកន្លែងចំណតឡូរី ក្បែរជើងភ្នំបាណន់ ស្ថិតក្នុងស្រុកបាណន់ ខេត្តបាត់ដំបង ដោយទីតាំងដែលអ្នកស្រីជួលនោះគឺប្រវែងប្រមាណ ៣ម៉ែត្រប៉ុណ្ណោះ ដែលអាចដាក់តុឆាមី បុកល្ហុង ពងទាកូន និងលក់ម្ជូរជាដើម ដោយទីតាំងនោះពុំមានដំបូលនោះទេដល់គ្រាន់តែយើងដាក់ឆ័ត្របានពីរប៉ុណ្ណោះ។

អ្នកស្រីបានបន្តថា ចំពោះតម្លៃនៃការជួលទីតាំងហាលវាលដ៏តូចនេះ គឺក្នុងមួយខែ ២០ម៉ឺនរៀល ដូច្នេះអ្នកស្រីត្រូវសន្សំក្នុងមួយថ្ងៃ ៧ម៉ឺនរៀលទើបគ្រប់គ្រាន់សម្រាប់បង់ប្រចាំខែឲ្យទៅម្ចាស់ចំណតឡូរីនេះ។ បើតូបដែលអាជីវករជួលលក់វត្ថុអនុស្សាវរីយ៍ និងមួកស្លឹកជាដើមនោះ គឺក្នុងមួយតូប ៣០ម៉ឺនរៀល ក្នុងមួយខែ។ ហើយប៉ុន្មានខែចុងក្រោយនេះមានការស្ងាត់ភ្ញៀវទេសចរឈឹង ហើយពេលខ្លះបើមានភ្ញៀវបន្តិចបន្តួច ក៏គេបានត្រឹមតែចូលទៅជិះឡូរីលេងកម្សាន្តមើលទេសភាពព្រៃភ្នំប៉ុណ្ណោះដោយគេពុំបានចាប់អារម្មណ៍លើចំណីអាហារដែលយើងដាក់លក់នោះឡើយ។ 

ដោយឡែក យុវជនម្នាក់ដែលជាអ្នកបើកបរឡូរី បានបញ្ជាក់ថា បើខុសពីថ្ងៃសៅរ៍ អាទិត្យ ឬថ្ងៃបុណ្យទាន ភ្ញៀវទេសចរដែលមកកំសាន្តក៏ស្ងាត់ដូចគ្នា រីឯតម្លៃដែលភ្ញៀវទេសចរជិះឡូរីកំសាន្តនៅក្នុងរយៈចម្ងាយ ៤គីឡូម៉ែត្រ ជុំវិញជើងភ្នំបាណន់ គឺសម្រាប់ភ្ញៀវទេសចរជាតិបើទិញសំបុត្រក្នុងមួយនាក់ ១៧.០០០ រៀល ដោយឡែកសម្រាប់ភ្ញៀវបរទេសគឺក្នុងមួយនាក់ តម្លៃ ២៩.០០០ រៀល (ជិះទៅ និងជិះត្រឡប់មកវិញ)។

បច្ចុប្បន្នក៏មានអាជីវករខ្លះត្រៀមរកតុ រើឆត្រ ត្រឡប់ទៅផ្ទះខ្លះហើយ ដោយសារតែការលក់ដូរកំបុិក កំប៉ុក វាមិនអាចបានកម្រៃទប់ទល់ទៅនឹងការចំណាយលើការជួលទីតាំងនោះបានឡើយ ព្រោះពួកគាត់លក់ត្រឹមចំណីអាហារតាមផ្លូវ បែបសាមញ្ញៗប៉ុណ្ណោះ ប៉ុន្តែពួកគាត់កំពុងពិភាក្សាគ្នា ដើម្បីសំណូមពរទៅម្ចាស់ទីតាំងក្រែងបានបញ្ចុះតម្លៃខ្លះ៕

អត្ថបទ៖ សោ និយមរ័ត្ន