គំនរសំរាមនៅលើផ្លូវចូលផ្សារ រតនាផ្លាហ្សា កំពុងជះក្លិនមិនល្អដល់ពលរដ្ឋ

គំនរសំរាមដែលគេយកមកគរទុកនៅលើផ្លូវផ្សារ រតនាផ្លាហ្សារ ប្រែក្លាយជាទីតាំងចោលសំរាមជាប្រចាំថ្ងៃ ធ្វើឱ្យគំនរសំរាមត្រូវថ្ងៃត្រូវភ្លៀងត្រូវខ្យល់កាកសំណល់សំរាមទាំងនេះស្អុយរលួយ ជះក្លិនទៅលើប្រជាពលរដ្ឋដែលរស់នៅជិតនោះក៏ដូចអ្នកធ្វើដំណើរឆ្លងកាត់ទីនោះផងដែរ។

ក្លិនស្អុយពីគំនរសំរាមនេះបានធ្វើឱ្យប៉ះពាល់យ៉ាងខ្លាំងទៅដល់សុខភាព និងជីវភាពរស់នៅរបស់ប្រជាពលរដ្ឋទាំងចាស់ទាំងក្មេងដែលកំពុងប្រឈមទៅនឹងការកើតមានជំងឺឆ្លងផ្សេងៗ។

លោក ម៉ិល ភារម្យ ជាពលរដ្ឋរស់នៅទីនោះបានឱ្យដឹងថា ពីមុនទីតាំងនេះពុំមានការចោលសំរាមបែបនេះទេ គឺមាននៅជាប់ក្បែរផ្លូវសហព័ន្ធរុស្ស៊ី ក្រោមស្ពានអាកាសផ្សារដីហុយឯណោះ ប៉ុន្តែដោយទីតាំងចាស់នោះ មានគេមកជួល ទើបគេលែងឱ្យអោយចោល ក៏ងាកមកចោលសំរាមនៅទីនេះវិញម្តង។ លោកបានឱ្យដឹងទៀតថា សំរាមនេះភាគច្រើន មិនមែនសំរាមអ្នករស់នៅទីនេះទេ គឺមានអ្នកលក់ដូរតាមរទេះ និងអ្នកមកពីក្រៅយកមកបោះចោល។

សូមបញ្ជាក់ផងដែរថា ទីតាំងគំនរសំរាមខាងលើ ស្ថិតលើគំរប ឌឺហ្គែរលូទឹកស្អុយ ហើយពេលបច្ចុប្បន្ន លូនោះបានស្ទះ ហូរទឹកកខ្វក់ស្អុយចេញមកទៀតផង។

ពាក់ព័ន្ធករណីខាងលើនេះ ក្រុមការងារ កម្ពុជាថ្មី បានទាក់ទងទៅលោក ម៉ូវ ម៉ានិត អភិបាលខណ្ឌសែនសុខ លោកបានប្រាប់ថា «លោកនឹងបញ្ជាទៅជំនាញ មន្ត្រីពាក់ព័ន្ធ អាជ្ញាធរមូលដ្ឋានចុះពិនិត្យ អោយក្រុមហ៊ុនប្រមូលសំរាមមកកើបចេញ សំអាតឱ្យស្អាត និងមិនអនុញ្ញាតអោយបន្តដាក់សំរាមទីនោះទៀតទេ»៕

អត្ថបទ៖ សំណាង