សន្តិសុខសង្គម

ចាប់ខ្លួនជនសង្ស័យម្នាក់នៅភ្នំពេញ ករណីលួចម៉ូតូពីខេត្តកំពង់ចាម

បានផុស

២ ខែ មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

ជនសង្ស័យម្នាក់ ត្រូវសមត្ថកិច្ច នៃនាយកដ្ឋាននគរបាលព្រហ្មទណ្ឌ សហការជាមួយកម្លាំងនគរបាល ស្នងការនគរបាលរាជធានីភ្នំពេញ តាមចាប់ខ្លួនបាន ពាក់ព័ន្ធករណីលួចម៉ូតូ ១ គ្រឿង ពីស្រុកកំពង់សៀម ខេត្តកំពង់ចាម កាលពីថ្ងៃទី ២៨ ខែវិច្ឆិកា ឆ្នាំ ២០២៤ ស្ថិតនៅចំណុចសង្កាត់វាលវង់ ខណ្ឌ ៧ មករា រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្ដមសេនីយ៍ត្រី ខេង ម៉េងឈាង អនុប្រធាននាយកដ្ឋាន ដែលដឹកនាំកម្លាំង បានឱ្យដឹងថា ក្រោយទទួលបានបទបញ្ជាពីលោកឧត្ដមសេនីយ៍ឯក ង៉េង ជួ ប្រធាននាយកដ្ឋានថាមានជនសង្ស័យម្នាក់ធ្វើសកម្មភាពលួចម៉ូតូ ១ គ្រឿង ម៉ាកហុងដាឌ្រីម សេ ១២៥ ផលិតឆ្នាំ ២០២២ ពាក់ផ្លាកលេខ កំពង់ចាម ១AC-៩៩៤៩ កាលពីថ្ងៃទី ២៨ ខែវិច្ឆិកា ឆ្នាំ ២០២៤ វេលាម៉ោង ០៤ និង ០២ នាទី ទៀបភ្លឺ នៅចំណុចភូមិត្រកួន ឃុំក្រឡា ស្រុកកំពង់សៀម ខេត្តកំពង់ចាម ធ្វើដំណើរឆ្ពោះមករាជធានីភ្នំពេញ ទើបលោកបានដឹកនាំកម្លាំងសហការចាប់ខ្លួនជនសង្ស័យម្នាក់នៅត្រង់ចំណុចសង្កាត់វាលវង់ ខណ្ឌ ៧ មករា រាជធានីភ្នំពេញ។

ជនសង្ស័យចាប់ខ្លួនឈ្មោះ ឈឺន ជីន ឬ ឈឺន ជីម ភេទប្រុស អាយុ ៦២ ឆ្នាំ ជនជាតិខ្មែរ អាសយដ្ឋានផ្ទះជួល ម្តុំវត្តតាំងកសាង សង្កាត់កាកាបទី ២ ខណ្ឌពោធិ៍សែនជ័យ។ ក្រោយចាប់ខ្លួន សមត្ថកិច្ចដកហូតម៉ូតូដែលលួចបាន រួមនឹងវត្ថុតាងសម្រាប់ធ្វើសកម្មភាពមួយចំនួនផងដែរ។