សន្តិសុខសង្គម

ឃាត់ខ្លួនសិស្សសាលា ១៣ នាក់ មកអប់រំ ក្រោយប្រមូលផ្ដុំគ្នាលេងល្បែងស៊ីសង និងជក់បារីអេឡិចត្រូនិក

បានផុស

២០ វិនាទី មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

កម្លាំងគណៈបញ្ជាការឯកភាពខណ្ឌទួលគោក ចុះទៅប្រមូលសិស្សសាលាប្រុស-ស្រី ១៣ នាក់ ដែលជួបជុំគ្នាលេងល្បែងស៊ីសង និងជក់បារីអេឡិចត្រូនិក (YOZZ) ក្នុងហាងកាហ្វេ ១ កន្លែង យីហោ Immortal Cafe យកមកអប់រំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ២៨ ខែវិច្ឆិកា ឆ្នាំ ២០២៤ ម្សិលមិញនេះ លោក ជា ពិសី អភិបាលខណ្ឌទួលគោក បានចាត់ឲ្យ លោក ទាវ សំអឿន និងលោក ឈាង វុទ្ធី អភិបាលរង ដឹកនាំកម្លាំងគណៈបញ្ជាការឯកភាពខណ្ឌទួលគោក ចុះពិនិត្យទីតាំងលក់កាហ្វេ ឈ្មោះ Immortal Cafe ដែលមានទីតាំងស្ថិតនៅផ្ទះលេខ 188E1 ផ្លូវ 146z ភូមិ ៥ សង្កាត់ទឹកល្អក់ទី ២ ខណ្ឌទួលគោក។ ជាក់ស្ដែងកម្លាំងបានពិនិត្យឃើញមានសិស្សសាលាចំនួន ១៣ នាក់ (ស្រី ៥ នាក់) កំពុងជួបជុំគ្នាលេងល្បែងស៊ីសង និងជក់បារីអេឡិចត្រូនិកយ៉ាងអនាធិបតេយ្យ។

ក្រោយប្រតិបត្តិការ កម្លាំងអាជ្ញាធរ បាននាំយកសិស្សទាំង ១៣ នាក់ នោះ ទៅអធិការដ្ឋាននគរបាលខណ្ឌទួលគោក ធ្វើតេស្តទឹកនោមរកសារធាតុញៀន (លទ្ធផលពុំមានទាំង ១៣ នាក់) រួចធ្វើកំណត់ហេតុអប់រំ និងអញ្ជើញឲ្យឪពុកម្ដាយមកធានាយកទៅផ្ទះវិញ។

តាមការបញ្ជាក់ពី លោក ឈាង វុទ្ធី អភិបាលរងខណ្ឌទួលគោក បានឲ្យដឹងថា ដោយឡែកម្ចាស់ហាងកាហ្វេ ឈ្មោះ ខុន ពុទ្ធារិទ្ធ បាននាំមកសាលាសង្កាត់ ដើម្បីធ្វើកំណត់ហេតុ ណែនាំ និងបិទអាជីវកម្មទាំងស្រុងតែម្ដង៕

អត្ថបទ ៖ សុភា