អាជ្ញាធរខណ្ឌទួលគោក នឹងចាត់វិធានការចំពោះទីតាំងអាជីវកម្មណាដែលធ្វើឲ្យបាត់បង់សណ្ដាប់ ធ្នាប់ និងរំលោភលើចំណីផ្លូវ

អាជ្ញាធរខណ្ឌទួលគោក នឹងចាត់វិធានការចំពោះទីតាំងប្រកបអាជីវកម្មណាដែលយកផ្លូវសាធារណៈធ្វើជាចំណតបង្កការកកស្ទះចរាចរណ៍ និងបាត់បង់សណ្ដាប់ធ្នាប់។

លោក ស៉ឹម សុផង់ អភិបាលរង ទទួលបន្ទុកការងារបរិស្ថានអនាម័យសណ្តាប់ធ្នាប់ នៃគណៈអភិបាលខណ្ឌទួលគោក បានបញ្ជាក់ប្រាប់នារសៀលថ្ងៃទី២ ខែធ្នូ ឆ្នាំ២០២៤នេះថា ដោយទទួលបានការណែនាំពីលោក ឃួង ស្រេង អភិបាលរាជធានីភ្នំពេញហើយលោកអភិបាលខណ្ឌទួលគោកបានចាត់ឲ្យរូបលោកចុះរៀបចំសណ្ដាប់ធ្នាប់តាមទីតាំងប្រកបអាជីវកម្មមួយចំនួនជាពិសេសទីតាំងហាងកាហ្វេក្បែរមន្ទីរពេទ្យកុមារជាតិដែលយកផ្លូវសាធារណៈធ្វើជាចំណតបង្កឲ្យមានការកកស្ទះ និងបាត់បង់សណ្ដាប់ធ្នាប់។ ក្នុងនោះដែរមានទីតាំងមួយចំនួនមិនបានចូលរួមសហការជាមួយអាជ្ញាធរប៉ុន្តែទោះជាយ៉ាងណាអាជ្ញាធរនឹងចាត់វិធានការរដ្ឋបាលហើយអាចឈានការចាត់វិធានការក្ដៅដោយស្ទួចយានយន្តយកទៅរក្សារនៅសាលាខណ្ឌផងដែរ។

គួរបញ្ជាក់ផងដែរ កាលពីថ្ងៃទី២៨ ខែវិច្ឆិការ ឆ្នាំ២០២៤ កម្លាំងគណៈបញ្ជាការឯកភាពខណ្ឌទួលគោក បានចុះរៀបចំសណ្តាប់ធ្នាប់ និងធ្វេីកំណត់ហេតុណែនាំដល់ម្ចាស់អាជីវកម្មលក់ការហ្វេ អាហារដ្ឋាន នៅផ្លូវលេខ២៥៧ កែងផ្លូវលេខ១២២ សង្កាត់ទឹកល្អក់ទី១ បានចំនួន៥ទីតាំង ក្នុងនោះមួយទីតាំងមិនសហការចូលរួមជាមួយអាជ្ញាធរនោះឡើយ គឺទីតាំងហាងការហ្វេ យីហោ TUBE COFEE ។

លោក ជា ពិសី អភិបាលខណ្ឌទួលគោកបានឱ្យដឹងថា ដោយមើលឃើញការចតរថយន្ត ម៉ូតូ គ្មានសណ្តាប់ធ្នាប់ នៅតាមផ្លូវ២៥៧ កែងផ្លូវលេខ១២២ ក្រោយមន្ទីរពេទ្យកុមារជាតិ សង្កាត់ទឹកល្អក់១ ទើបលោកបានចាត់ឲ្យលោក សុឹម សុផង់ អភិបាលរងខណ្ឌ ទទួលបន្ទុកការងារបរិស្ថានអនាម័យ សណ្តាប់ធ្នាប់ដឹកនាំកម្លាំងគណៈបញ្ជាការឯកភាពខណ្ឌទួលគោក ចុះរៀបចំសណ្តាប់ធ្នាប់ និងធ្វេីកំណត់ហេតុណែនាំដល់ម្ចាស់អាជីវកម្មលក់ការហ្វេ ចំនួន៥ទីតាំង ឲ្យចូលរួមសហការជាមួយអាជ្ញាធរ ដើម្បីរក្សារបៀបរៀបរយសណ្ដាប់ធ្នាប់តាមដងផ្លូវបានល្អប្រសើរ៕

អត្ថបទ៖ សុភា