បង្រ្កាបអ្នកលេងបៀ និងឡូតូអនឡាញ ១១នាក់ បញ្ជូនទៅស្នងការមណ្ឌលគិរី

កងកម្លាំងនៃអធិការដ្ឋាននគរបាលស្រុកកែវសីមា ខេត្តមណ្ឌលគិរី បានឃាត់ខ្លួនមនុស្សប្រុសស្រីចំនួន ១១នាក់កាលពីរសៀលថ្ងៃទី៥ ខែធ្នូ ឆ្នាំ២០២៤ ពាក់ព័ន្ធករណីលេងល្បែងបៀ និងល្បែងឡូតូ អនឡាញខុសច្បាប់។

លោក ឡោ សុខា ស្នងការនគរបាលខេត្តមណ្ឌលគិរី បានឲ្យដឹងថា បន្ទាប់ពីទទួលដំណឹងថា មានអ្នកលេងល្បែងបៀ និងឡូតូអនឡាញ លោកបានបើកប្រតិបត្តិការបង្ក្រាបបានចំនួន ៣ទីតាំង ក្នុងស្រុកកែវសីមា ឃាត់ខ្លួនបានមនុស្សប្រុសស្រីចំនួន ១៧នាក់ ដកហូតម៉ូតូ ១៥គ្រឿង និងសម្ភារៈដំណើការនៃកាលេងល្បែងមួយចំនួនទៀត។ អធិការស្រុកកែវសីមា បានអប់រំណែនាំធ្វើកិច្ចសន្យាមនុស្ស ៦នាក់ក្នុងចំណោម ១៧នាក់ឲ្យវិលត្រឡប់ទៅផ្ទះវិញ និង១១នាក់ទៀត កំពុងបន្តនិតិវិធីនៅស្នងការដ្ឋាន​នគបាលខេត្តមណ្ឌលគិរី។

លោកឧត្តមសេនីយ៍ទោស្នងការ បានបញ្ជាក់ថា លោកតែង​ណែនាំដល់គ្រប់អធិការដ្ឋាននគរបាលក្រុង ស្រុក និងការិយាល័យជំនាញ ប៉ុស្ត៍រដ្ឋបាលឃុំសង្កាត់ ត្រូវតែចាត់វិធានការអប់រំណែនាំ ឬវិធានការបង្ក្រាប ដោយមិនអនុគ្រោះចំពោះករណីល្បែងស៊ីសងខុសច្បាប់គ្រប់ប្រភេទ។ បើប្រជាពលរដ្ឋដែលប្រព្រឹត្តល្បែងស៊ីសង ត្រូវបញ្ឈប់ជាបន្ទាន់ នូវសកម្មភាពល្មើសច្បាប់ ករណីមិនព្រមរាងចាលទេនោះ ត្រូវកសាងសំណុំរឿងបញ្ជូនទៅតុលាការ៕

អត្ថបទ៖ រៀម សុខហេង