នគរបាលស្រុកបាទីបញ្ជូនខ្លួនជនជាតិចិនដែលផ្ទុះអាវុធជាង៧០គា្រប់ទៅស្នងការខេត្តដើម្បីអនុវត្តច្បាប់

កម្លាំងនគរបាលនៃអធិការដ្ឋាននគរបាលស្រុកបាទី ស្នងការដ្ឋាននគរបាលខេត្តតាកែវ បានបញ្ជូនខ្លួនជនជាតិចិនតៃវ៉ាន់ដែលផ្ទុះអាវុធ៧១គ្រាប់កាលពីយប់រំលងអាធ្រាត្រថ្ងៃទី៧ ខែធ្នូ ឆ្នាំ២០២៤ ដល់ស្នងការដ្ឋាននគរបាលខេត្តហើយ ដើម្បីអនុវត្តនីតិវិធីច្បាប់។ ការបញ្ជូនខ្លួនជនសង្ស័យរូបនេះ បន្ទាប់ពីកម្លាំងជំនាញនៃអធិការស្រុកបានឃាត់ខ្លួន និងបានសួរនាំរួចរាល់។ នេះបើតាមការបញ្ជាក់ពីលោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទី ប្រាប់ កម្ពុជាថ្មី នៅព្រឹកថ្ងៃទី៨ធ្នូនេះ។

លោកអធិការស្រុកបន្ថែមថា ករណីផ្ទុះអាវុធចំនួន៧១គ្រាប់បង្កឡើងដោយបុរសជនជាតិចិនតៃវ៉ាន់នេះ​ កម្លាំងជំនាញនៃអធិការស្រុកបាទី បានបញ្ជូនខ្លួនជនសង្ស័យទៅស្នងការដ្ឋាននគរបាលខេត្តតាកែវរួចហើយ ដើម្បីអនុវត្តតាមនីតិវីធីច្បាប់។ តែទោះយ៉ាងណា ករណីនេះលោកអធិការស្រុកមិនបានបញ្ជាក់ពីមូលហេតុនោះទេ។

សូមបញ្ជាក់ថា កាលពីយប់រំលងអធ្រាត្រឈានចូលថ្ងៃទី៧ ខែធ្នូ ឆ្នាំ២០២៤ នៅចំណុចវាលស្រែភូមិកណ្តាល​ ឃុំលំពង់​ ស្រុកបាទី​ ខេត្តតាកែវ មានករណីផ្ទុះអាវុធមួយបង្កឡើងដោយបុរសជនជាតិចិនតៃវ៉ាន់ឈ្មោះ CAI JIA YOU មានអាយុ​ ២០ឆ្នាំ​ ប្រើប្រាស់កាំភ្លើងខ្លី ម៉ាក Sig Sauer បាញ់ឡើងលើចំនួន៧១គ្រាប់ បង្ក​ការ​ភ្ញាក់​ផ្អើល​យ៉ាង​ខ្លាំង​ដល់ប្រជាពលរដ្ឋ​ និងសមត្ថកិច្ចមូលដ្ឋាននាំគ្នាចុះអន្តរាគមន៍​។

លោក វ៉ី សំណាង អភិបាលខេត្តតាកែវ បានឲ្យដឹងដែរថា ជនជាតិចិនតៃវ៉ាន់រូបនេះ ត្រូវបានកម្លាំងនគរបាលស្រុកបាទីចាប់ខ្លួន និងបានបញ្ជូនទៅស្នងការខេត្តដើម្បីអនុវត្តនីតិវិធីច្បាប់។ លោកក៏បានសង្កត់ធ្ងន់ដែរថា លួចបាញ់បាន ប៉ុន្តែគុកនៅរង់ចាំជានិច្ច ដោយគ្មានជនណាអាចប្រព្រឹត្តបទល្មើស ហើយរួចខ្លួនពីសំណាញ់ច្បាប់នោះឡើយ៕

អត្ថបទ៖ សុខុម