ជនរងគ្រោះក្នុងករណីបាក់ច្រាំងទន្លេសង្កត់ទូកនៅស្រុកខ្សាច់កណ្ដាល នៅមិនទាន់រកឃើញនៅឡើយ

ជនរងគ្រោះម្នាក់ក្នុងចំណោមជនរងគ្រោះចំនួន៤នាក់ក្នុងហេតុការណ៍បាក់ច្រាំងទន្លេសង្កត់លើទូកដឹកខ្សាច់កាលពីវេលា​ទៀប​ភ្លឺថ្ងៃទី១១ធ្នូនេះ នៅមិនទាន់រកឃើញនៅឡើយទេ គិតត្រឹមល្ងាចថ្ងៃទី១១ធ្នូនេះ ខណៈអាជ្ញាធរមូលដ្ឋាន និងមន្ត្រីជំនាញកំពុងខិតខំស្វែងរកសពជូនគ្រួសាររងគ្រោះ។ នេះបើតាមការបញ្ជាក់ពីរដ្ឋបាលខេត្តកណ្ដាលនៅមុននេះបន្តិច។

រដ្ឋបាលខេត្តកណ្ដាលបានបញ្ជាក់ថា ករណីនេះគឺកើតឡើងដោយសារគ្រោះធម្មជាតិ បាក់ច្រាំងទន្លេមេគង្គប្រវែងជាង​៣០០ម៉ែត្រ ទទឹង៤០ម៉ែត្រ និងជម្រៅ ៧ម៉ែត្រ បណ្តាលឱ្យបាក់ស្រុតកៀកនឹងលំនៅឋានរបស់ប្រជាពលរដ្ឋ ស្ថិតនៅត្រង់ចំណុចភូមិព្រែកតាបែន ឃុំស្វាយរមៀត ស្រុកខ្សាច់កណ្តាល ខេត្តកណ្តាល។ ក្នុងករណីនេះបណ្តាលឱ្យសង្កត់លើទូក​៣គ្រឿង និងបង្កឱ្យមនុស្ស៤នាក់គ្រោះថ្នាក់ ក្នុងនោះម្នាក់របួសស្រាល ពីរនាក់របួសធ្ងន់ និងម្នាក់ទៀតបាត់ខ្លួនរកសាក​សពមិនទាន់ឃើញ។

ក្នុងដំណើរចុះពិនិត្យនៅទីតាំងកើតហេតុ លោក គួច ចំរើន អភិបាលនៃគណៈអភិបាលខេត្តកណ្ដាល បានអំពាវនាវដល់ប្រជាពលរដ្ឋដែលរស់នៅតាមមាត់ទន្លេត្រូវមានការប្រុងប្រយ័ត្នអោយបានខ្ពស់ ដើម្បីជៀសវាងនូវគ្រោះអកុសលនានា ដែលអាចកើតមានជាយថាហេតុ និងស្នើដល់អាជ្ញាធរមូលដ្ឋានត្រូវរកកន្លែងសុវត្ថិភាពសម្រាប់ប្រជាជនស្នាក់នៅជាបណ្ដោះអាសន្ន ដើម្បីធានាសុវត្ថិភាព។

សូមបញ្ជាក់ថា ករណីបាក់ច្រាំងទន្លេនេះ បើតាមរដ្ឋបាលខេត្ត គឺបណ្ដាលមកពីគ្រោះធម្មជាតិ បានកើតឡើងកាលពីវេលាម៉ោង៤ទៀបភ្លឺថ្ងៃទី១១ ខែធ្នូ ឆ្នាំ២០២៤ ដែលបានបណ្តាលឱ្យបាក់ច្រាំងសង្កត់លើទូក៣គ្រឿង និងបង្កឱ្យមនុស្ស៤នាក់គ្រោះថ្នាក់រួមមាន៖ ទី១ឈ្មោះ ឈុន ភេទប្រុស អាយុ៤៥ឆ្នាំ នៅភូមិឬស្សី ឃុំថ្មគ្រែ ស្រុកចិត្របុរី ខេត្តក្រចេះ (ម្ចាស់ទូក) ទី២.ឈ្មោះ ឃិន ភេទប្រុស អាយុ៣៣ឆ្នាំ នៅភូមិបារាយ ឃុំកពង់ចាម ស្រុកសំបូរ ខេត្តក្រចេះ (កម្មករ) ទី៣.ឈ្មោះ ឃុន ភេទប្រុស អាយុ៣៣ នៅភូមិបារាយ ឃុំកំពង់ចាម ស្រុកសំបូរ ខេត្តក្រចេះ (កម្មករ) និងទី៤ . ឈ្មោះ សឿ សឹង ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មករទូក មានស្រុកកំណើតនៅភូមិបារាយ ឃុំកំពង់ចាម ស្រុកសំបូរ ខេត្តក្រចេះ (បានបាត់ខ្លួន)៕

អត្ថបទ៖ សុខុម