អាជ្ញាធរខណ្ឌសែនសុខ ជួសជុលស្ថាបនាប្រព័ន្ធលូប្រអប់មួយខ្សែទំហំ២ម៉ែត្រ ដេីម្បី​រំដោះទឹកនារដូវវស្សា​

នៅថ្ងៃទី១១ ខែធ្នូ ឆ្នាំ២០២៤ រដ្ឋបាលខណ្ឌសែនសុខ សហការជាមួយរដ្ឋបាល​រាជធានីភ្នំពេញបានដាក់គ្រឿងចក្រកាត់ផ្លូវបេតុងលេខ១០១៩​ (ភ្នំពេញ​-ហាណូយ)​ ស្ថាបនាដាក់លូប្រអប់ទំហំ២ម៉ែត្រ ដើម្បីរំដោះទឹកនារដូវវស្សា តភ្ជាប់ប្រឡាយខាងកេីតផ្លូវ​ ស្ថិតក្នុងភូមិឃ្មួញ​ សង្កាត់ឃ្មួញ ខណ្ឌសែនសុខ​ រាជធានីភ្នំពេញ​។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ បរិស្ថាន និងអនាម័យខណ្ឌសែនសុខ បានប្រាប់ កម្ពុជាថ្មី ថា ការស្ថាបនាដាក់លូប្រអប់ថ្មីនេះមាន​ទំហំ២ម៉ែត្រ​ ៤ជ្រុង​ ប្រវែង ២៨ម៉ែត្រ និងដាក់អណ្តូងរីហ្គា​ ផ្នែកខាងលិចផ្លូវ ដេីម្បី​នាំទឹកពីតំបន់ច្រមុះជ្រូក​ និងមុខវត្តឃ្មួញ​ ដែលធ្លាប់លិចលង់នារដូវស្សា​ ទៅភ្ជាប់ប្រឡាយខាងកេីតផ្លូវ​ ស្ថិតក្នុងភូមិឃ្មួញ​ សង្កាត់ឃ្មួញ ខណ្ឌសែនសុខ​។

លោកបានបញ្ជាក់ឱ្យដឹងទៀតថា ការធ្វើឡើងនេះ ដោយមានការយកចិត្តទុកដាក់ពីសាលារាជធានីភ្នំពេញ ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញ ក៏ដូចជាលោក ម៉ូវ ម៉ានិត អភិបាលនៃគណៈអភិបាលខណ្ឌសែនសុខ។ ដោយកន្លងមកទីតាំងខាងលើនេះ តែងតែមានការលិចលង់នារដូវវស្សា ដែលបង្កផលប៉ះពាលដល់ការរស់នៅប្រចាំថ្ងៃរបស់ប្រជាពលរដ្ឋ ។

ជុំវិញការដ្ឋានដាក់លូប្រអប់ថ្មីនេះ គឺមានរយៈពេលប្រហែលមួយសប្តាហ៍ ក្នុងដំណេីរការកាយដាក់លូ អាជ្ញាធរក៏សូមឲ្យអ្នកធ្វេីដំណេីរ​ មេត្តាយោគយល់​ និងអធ្យាស្រ័យ​ ចំពោះការរំខានដោយការដ្ឋាន​ និងសូមបង្កេីតការប្រុងប្រយ័ត្នពេលបេីកបរ៕

អត្ថបទ៖ សំណាង