សន្តិសុខសង្គម

ក្មេងទំនើង ៣ នាក់ ខំប្ដូរឈ្មោះក្រុម នៅតែគេចមិនផុតពីចំណាត់ការអាវុធហត្ថរាជធានីភ្នំពេញ

បានផុស

៤ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

ក្មេងទំនើង ៣ នាក់ ធ្លាប់ជាសមាជិកក្រុម team98 តែដោយសមត្ថកិច្ចតាមចាប់ពេក បានបំបែកក្រុម និងប្ដូរឈ្មោះមកជា team មុខព្រលានវិញ ក៏ត្រូវបានអាវុធហត្ថរាជធានីភ្នំពេញឃាត់ខ្លួន និងយកមកអប់រំតាមវិធានការរដ្ឋបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាវុធហត្ថរាជធានីភ្នំពេញ បានឱ្យដឹងថា រយៈពេលប៉ុន្មានថ្ងៃ ក្នុងដើមខែធ្នូ ឆ្នាំ ២០២៤ នេះ ដោយមានបទបញ្ជាម៉ឺងម៉ាត់របស់លោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ កម្លាំងអាវុធហត្ថរាជធានីភ្នំពេញ ក៏ដូចជាកម្លាំងអាវុធហត្ថតាមបណ្ដាមូលដ្ឋានខណ្ឌទាំង ១៤ បានបន្តចុះបង្ក្រាប និងទប់ស្កាត់ក្រុមក្មេងទំនើង នៅតាមគោលដៅសំខាន់ៗ ក្នុងភូមិសាស្ត្ររាជធានីភ្នំពេញ ជាប់ជាប្រចាំដូចភ្លៀងរលឹម និងបានចាត់វិធានការអប់រំលើក្មេងទំនើងសរុប ៨៧ នាក់ ដែលបានប្រមូលផ្ដុំគ្នាកណ្ដាលអធ្រាត្រមិនចូលផ្ទះ ផឹកស្រា ជក់វែប នៅទីសាធារណៈយ៉ាងអនាធិបតេយ្យ។

អាវុធហត្ថបានឱ្យដឹងទៀតថា ក្នុងនោះ មានក្មេងទំនើង ៣ នាក់ ដែលធ្លាប់ជាសមាជិកក្រុមក្មេងទំនើង team98 តែដោយសមត្ថកិច្ចតាមចាប់ team98 ពេក ក៏បានបំបែកក្រុម និងប្ដូរឈ្មោះមកជា team មុខព្រលានវិញ តែត្រូវបានអាវុធហត្ថរាជធានីភ្នំពេញក្នុងមូលដ្ឋានខណ្ឌកំបូលធ្វើការឃាត់ខ្លួន និងយកមកអប់រំតាមវិធានការរដ្ឋបាល ដែលក្រុមនេះមានប្រវត្តិធ្លាប់ពាក់ព័ន្ធនឹងជម្លោះដេញវាយគ្នា ជាមួយក្រុមទំនើងផ្សេងទៀត ជាច្រើនលើក។ ជាពិសេស សមាជិកមួយចំនួន ធ្លាប់ត្រូវបានអាវុធហត្ថរាជធានីភ្នំពេញឃាត់ខ្លួនបញ្ជូនទៅតុលាការផងដែរ៕

អត្ថបទ ៖ សំណាង