ចៅសង្កាត់ព្រែកឯង ទុកពេលពីរសប្ដាហ៍ឲ្យអ្នកចាក់បេតុងលើផ្លូវឈូសឆាយចេញវិញ

លោក សំ សុធារី ចៅសង្កាត់ព្រែកឯង បានជូនដំណឹងដល់ប្រជាពលរដ្ឋរស់នៅក្នុងមូលដ្ឋានសង្កាត់ព្រែកឯង ខណ្ឌច្បារអំពៅ រាជធានីភ្នំពេញ ត្រូវរួសរាន់ឈូសឆាយបេតុងដែលចាក់លើផ្លូវចេញឲ្យអស់ក្នុងរយៈពេល២សប្តាហ៍។

លោក សំ សុធារី បានបន្តថា នៅសងខាងផ្លូវក្នុងភូមិមិត្តភាព និងភូមិមិត្តភាព១ គឺប្រជាពលរដ្ឋបានចាក់បេតុងលើផ្លូវដែលបង្កឲ្យទឹកដក់មកលើផ្លូវ ពិសេសនាំឲ្យប៉ះពាល់ដល់ការធ្វើដំណើររបស់ប្រជាពលរដ្ឋ និងថែមទាំងបង្កគ្រោះថ្នាក់ចរាចរណ៍ទៀតផង។

លោកចៅសង្កាត់ក៏សូមឲ្យប្រជាពលរដ្ឋរក្សាទុកផ្លូវដែលអាជ្ញាធរស្ថាបនារួចដូចដើម ហើយបើនាំគ្នាចាក់បេតុងលើផ្លូវមុខផ្ទះបែបនេះ ធ្វើឲ្យទឹកដក់លើផ្លូវហើយថែមទាំងបាត់ទំរង់ផ្លូវទៀតផង។ ដូច្នេះប្រជាពលរដ្ឋត្រូវរួសរាន់ឈូសឆាយបេតុងដែលបានចាក់មុខផ្ទះនោះចេញជាបន្ទាន់ក្នុងរយៈ២សប្តាហ៍ គិតចាប់ពីថ្ងៃទី១១ខែធ្នូនេះតទៅ៕

អត្ថបទ៖ នរា