ស្នងការខេត្តកណ្ដាល ស្នើឲ្យចាងហ្វាងសារព័ត៌មានមួយរូបចេញមុខបំភ្លឺពីការចុះផ្សាយករណីធ្វើទារុណកម្មលើជនជាតិចិននៅក្រុងសំពៅពូន

ស្នងការដ្ឋាននគរបាលខេត្តកណ្ដាល កាលពីថ្ងៃទី១៥ ខែធ្នូ ឆ្នាំ២០២៤នេះ បានស្នើឲ្យចាងហ្វាងគេហទំព័រសារព័ត៌មាន ស៊ីអេចអ ធីវីអនឡាញ មកបំភ្លឺព័ត៌មានលម្អិតជាបន្ទាន់ពាក់ព័ន្ធការចុះផ្សាយពីករណីធ្វើទារុណកម្មទៅលើជនជាតិចិន នៅក្រុងសំពៅពូន ខេត្តកណ្តាល។ ជាមួយនឹងការស្នើឲ្យម្ចាស់គេហទំព័រព័ត៌មានចេញមុខមកបំភ្លឺនេះ ស្នងការដ្ឋាននគរបាលខេត្តកណ្ដាលក៏ស្នើឲ្យក្រសួងព័ត៌មាន មានវិធានការទៅលើអង្គភាពគេហទំព័រ សារព័ត៌មាន ស៊ីអេចអ ធីវីអនឡាញ ដែលបានចុះផ្សាយក្នុងរូបភាពញុះញង់បំផ្លើសការពិត។

ការស្នើឲ្យម្ចាស់គេហទំព័រសារព័ត៌មាន ស៊ីអេចអ ធីវីអនឡាញ ចេញមុខបកស្រាយបំភ្លឺនេះ ធ្វើឡើងបន្ទាប់ពីស្នងការដ្ឋានខេត្តបានឃើញគេហទំព័រមួយនេះចុះផ្សាយមានខ្លឹមសារថា «បែកធ្លាយការធ្វើទារុណកម្មទៅលើជនជាតិចិន យ៉ាងព្រៃផ្សៃអគារអនឡាញខុសច្បាប់ នៅក្រុងសំពៅពូន ខេត្តកណ្តាល នៅចំណុចស្អាន៧២។

បើតាមក្រុមការងារព័ត៌មាន និងប្រត្តិកម្មរហ័សនៃស្នងការដ្ឋាននគរបាលខេត្តកណ្តាល បានឲ្យដឹងថា ក្រោយពីទទួលព័ត៌មាននេះភ្លាម កម្លាំងជំនាញបានចុះស្រាវជ្រាវជុំវិញការចុះផ្សាយខាងលើ និងបានបញ្ជាក់ថា ចំពោះជនរងគ្រោះនៅក្នុងរូបភាពនេះ គឺមិនមាននៅក្នុងអគារនៅចំណុចស្ពានលេខ៧២ ស្ថិតក្នុងក្រុងសំពៅពូនដូចការចុះផ្សាយនោះទេ។ រហូតមកដល់ពេលនេះសមត្ថកិច្ចជំនាញមិនទាន់ទទួលបានបណ្តឹង ឬព័ត៌មានណាមួយថាមានការប្រើហិង្សានៅក្នុងទីតាំងអគារនោះដែរ។

ក្រុមការងារព័ត៌មាន និងប្រត្តិកម្មរហ័សនៃស្នងការដ្ឋាននគរបាលខេត្តកណ្តាល ក៏សូមឲ្យសាធារណជន និងបណ្តាញសារព័ត៌មានជ្រាប និងកុំមានការភាន់ច្រឡំ៕