អាជ្ញាធរខណ្ឌជ្រោយចង្វារ បន្តចុះត្រួតពិនិត្យអាហារដ្ឋានក្នុងសាលារៀន និងណែនាំមិនឲ្យលក់នំចំណីណាដែលប៉ះពាល់សុខភាពសិស្ស

រដ្ឋបាលខណ្ឌជ្រោយចង្វារបានដឹកនាំមន្ត្រីជំនាញនៃរដ្ឋបាលខណ្ឌចុះត្រួតពិនិត្យតាមអាហារដ្ឋានទាំងខាងក្នុង និងខាងក្រៅរបងសាលារៀន និងណែនាំដល់អាជីវករទាំងអស់ពិនិត្យការលក់ដូរនំចំណីណាដែលអាចប៉ះពាល់ដល់សិស្ស គឺមិនអនុញ្ញាតឲ្យបន្តលក់នោះទេ។

ជាក់ស្ដែងនៅព្រឹកថ្ងៃទី១៦ ខែធ្នូ ឆ្នាំ២០២៤ រដ្ឋបាលខណ្ឌជ្រោយចង្វារ ដឹកនាំដោយលោក វុធ សូវៀត នាយករងរដ្ឋបាលខណ្ឌជ្រោយចង្វារ ដោយមានការចូលរួមជាមួយការិយាល័យអប់រំ យុវជន និងកីឡា ការិយាល័យសង្គមកិច្ច និងសុខុមាលភាពសង្គម បានចុះពិនិត្យការលក់នំចំណីក្នុងសាលា និងជាប់របងសាលា ចំនួន២សាលា គឺវិទ្យាល័យព្រែកលៀប និងបឋមព្រែកលៀប ឱ្យអនុវត្តតាមសេចក្តីណែនាំរបស់ក្រសួងអប់រំ យុវជន និងកីឡា។

មន្ត្រីនៃរដ្ឋបាលខណ្ឌជ្រោយចង្វារបានលើកឡើងថា ការចុះត្រួតពិនិត្យនេះមិនមែនជាលើកទីមួយនោះទេ គឺមន្ត្រីជំនាញនៃរដ្ឋបាលខណ្ឌបានបន្តចុះត្រួតពិនិត្យជាបន្តបន្ទាប់កន្លងមកតាមសាលារៀនជាច្រើននៅក្នុងមូលដ្ឋានខណ្ឌជ្រោយចង្វារ និងសហការជាមួយគណៈគ្រប់គ្រងសាលាណែនាំជាប់ជាប្រចាំដល់ក្រុមអាជីវករដែលលក់នៅក្នុងហារដ្ឋានសាលាឲ្យយកចិត្តទុកដាក់ពីផលប៉ះពាល់ដល់សុខភាពរបស់សិស្ស។ ក្នុងករណីដែលពួកគាត់នៅតែបន្តលក់មិនគិតពីសុខភាពរបស់សិស្សានុសិស្សនោះ បើរកឃើញ គណៈគ្រប់គ្រងសាលាក៏ដូចជាអាជ្ញាធររដ្ឋបាលខណ្ឌមិនអនុញ្ញាតឲ្យគាត់បន្តលក់នៅអាហារដ្ឋានតាមសាលារៀនបន្តទៀតនោះឡើយ។

អាជីវករដែលលក់ដូរនៅក្នុងសាលាបានសំដែងក្ដីរីករាយ និងលើកឡើងថា ពួកគាត់បានយល់ដឹងច្បាស់ពីសុខភាពរបស់កូនៗតូចៗទាំងអស់។ ពួកគាត់ក៏មានកូនតូចៗដូចគ្នាក្នុងនាមជាអាណាព្យាបាល គឺមិនចង់ឲ្យកូនមានសុខភាពមិនល្អទេ គឺចង់ឲ្យកូនមានសុខភាពល្អ និងមករៀនមានចំណេះដឹង។ ពួកគាត់លក់ដូរតែនំចំណី ភេសជ្ជៈណា ដែលមិនប៉ះពាល់ដល់សុខភាព។

គួរបញ្ជាក់ផងកាលពីថ្ងៃទី១០ ខែធ្នូ ឆ្នាំ២០២៤ ក្រសួងអប់រំ យុវជន និងកីឡាបានចេញសេចក្តីជូនដំណឹងថ្មី ស្ដីពី ការហាមឃាត់ការទទួលទាន ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ ប្រភេទ នៅក្នុង និងជុំវិញជាប់បរិវេណគ្រឹះស្ថានសិក្សាចំណេះទូទៅសាធារណៈនិងឯកជន និងគ្រឹះស្ថានអប់រំ បច្ចេកទេសជាដើម៕

អត្ថបទ៖ សុភា