សន្តិសុខសង្គម

ជនសង្ស័យ ០២ នាក់ ឆក់ទូរស័ព្ទបានសម្រេច ជិះម៉ូតូគេចខ្លួន ជ្រុលបុកម៉ូតូ ០១ គ្រឿងទៀត ឃាត់បានម្នាក់

បានផុស

២ ខែ មុន

នៅ

ថ្ងៃអង្គារ ១៧ ធ្នូ ២០២៤

ដោយ

ជនសង្ស័យ ០២ នាក់ ឆក់ទូរស័ព្ទដៃពីជនរងគ្រោះបានសម្រេចនៅមូលដ្ឋានខណ្ឌដង្កោ រួចជិះម៉ូតូរត់គេចខ្លួន ត្រូវម្ចាស់ស្រែកចោរៗ តាមពីក្រោយ និងមានប្រជាពលរដ្ឋឃើញនាំគ្នាដេញតាម ធ្វើឲ្យជនសង្ស័យភ័យ ជិះទៅបុកម៉ូតូ ០១ គ្រឿងទៀតដួល នៅភូមិទួលពង្រ ខណ្ឌពោធិ៍សែនជ័យ ឃាត់បានម្នាក់ រីឯម្នាក់ទៀតគេចខ្លួនបាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យខាងលើ បានធ្វើសកម្មភាពត្រង់ចំណុចបុរីចំការដូង សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង ០៨ យប់ ថ្ងៃទី ១៦ ខែធ្នូ ឆ្នាំ ២០២៤។

តាមសម្ដីជនរងគ្រោះ បានឲ្យដឹងថា នៅមុនពេលកើតហេតុ ខណៈជនរងគ្រោះជិះម៉ូតូដោយទុកទូរស័ព្ទក្នុងឃ្លុបម៉ូតូតាមដងផ្លូវ ក៏មានជនសង្ស័យ ០២ នាក់ ជិះម៉ូតូ ០១ គ្រឿង ម៉ាកហុងដាឌ្រីមសង់ ២០២២ ពណ៌ខ្មៅ ពាក់ស្លាកលេខភ្នំពេញ 1KE-2274 មកក្បែរធ្វើសកម្មភាពឆក់យកបានសម្រេចហើយជិះគេចខ្លួនពីចំណុចកើតហេតុ។ ពេលនោះដែរ ជនរងគ្រោះបានស្រែកចោរៗ ហើយជិះម៉ូតូប្រដេញតាមពីក្រោយ ក៏មានប្រជាពលរដ្ឋឃើញនាំគ្នាដេញតាមពីក្រោយរហូតដល់ស្តុបទួលពង្រ ក្នុងសង្កាត់ចោមចៅទី ០១ ស្រាប់តែជនសង្ស័យជិះម៉ូតូទៅបុកជាមួយនឹងម៉ូតូ ០១ គ្រឿងទៀត ដែលឈប់រង់ចាំស្តុប បណ្ដាលឲ្យដួលខ្ទាតប៉ះនឹងបង្គោលស៊ីម៉ងត៍។ ភ្លាមៗ នោះ ប្រជាពលរដ្ឋនាំគ្នាឃាត់ខ្លួនបានម្នាក់ភ្លាមៗ រីឯម្នាក់ទៀតរត់ចោលគ្នាបាត់ស្រមោល។ លុះក្រោយមក ពលរដ្ឋបានទាក់ទងទៅសមត្ថកិច្ចមូលដ្ឋានចុះមកអន្តរាគមន៍ភ្លាមៗ និងនាំខ្លួនជនសង្ស័យយកទៅប៉ុស្តិ៍ ដើម្បីសួរនាំ។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវបានសមត្ថកិច្ចនគរបាលសង្កាត់ចោមចៅ ០១ ខណ្ឌពោធិ៍សែនជ័យ ប្រគល់ទៅឲ្យម្ចាស់ករណីខណ្ឌដង្កោវិញ ដើម្បីធ្វើការស្រាវជ្រាវរកបក្ខពួកបន្តចាត់ការតាមនីតិវិធីផ្លូវច្បាប់៕

អត្ថបទ ៖ សំណាង