អ្នកប្រើទឹកស្អាតនៅស្រុកសំរោង ខេត្តតាកែវ ស្នើអាជ្ញាធរជួយអន្តរាគមន៍ក្រោយឃើញវិក្កយបត្រប្រើអស់ជាង៤លានក្នុងមួយខែ

ពលរដ្ឋកំពុងប្រើប្រាស់បណ្តាញទឹកស្អាតរស់នៅភូមិស្វាយព្រៃ ឃុំលំចង់ ស្រុកសំរោង ខេត្តតាកែវ ស្នើដល់មន្ត្រីពាក់ព័ន្ធ ពិសេសលោក វ៉ី សំណាង អភិបាលនៃគណៈអភិបាលខេត្តតាកែវ មេត្តាជួយអន្តរាគមន៍ និងធ្វើអធិការកិច្ចលើក្រុមហ៊ុនទឹកស្អាត សំណាងឌីណាលំចង់ ដែលមានអាសយដ្ឋានភូមិលំចង់ ឃុំលំចង់ ស្រុកសំរោង ក្រោយចេញវិក្កយបត្រឲ្យពលរដ្ឋមួយគ្រួសារ ក្នុងខែវិច្ឋិកា ឆ្នាំ២០២៤ ថាបានប្រើប្រាស់អស់ទឹក១,៧៤៤ម៉ែត្រគូប គិតជាទឹកប្រាក់​៤,០១១,២០០​លានរៀល។

តាមការបញ្ជាក់ពីអតិថិជនឈ្មោះ សុខ សុខា ភេទស្រី ដែលកំពុងរងគ្រោះក្នុងករណីនេះថា រាល់ខែគាត់ប្រើប្រាស់ទឹកយ៉ាងច្រើនអស់៤ម៉ឺន ទៅ៥ម៉ឺនរៀលប៉ុណ្ណោះ លើសអីតែខែវិច្ឆិកា អស់ដល់ទៅជាង៤លានរៀល។ គាត់បន្ថែមថា គេសុំសម្រួលឲ្យគាត់បង់ត្រឹម១,២០០,០០០រៀលវិញ ដើម្បីបញ្ចប់រឿង តែគាត់មិនព្រមព្រោះវាហួសហេតុពេក។ ហើយនេះក៏មិនមែនជាករណីថ្មីដែរ ជាករណីចាស់កើតឡើងដដែលៗដែលថៅកែទឹកស្អាតខាងលើធ្លាប់ធ្វើដាក់អតិថិជនគាត់ក្នុងសហគមន៍។

ជុំវិញករណីខាងលើនេះ នៅព្រឹកថ្ងៃទី១៧ ខែធ្នូ ឆ្នាំ២០២៤ លោក ដា ហៅម៉ាប់ ថៅកែទឹកស្អាត សំណាងឌីណាលំចង់ បានបកស្រាយថា​ បានជាយ៉ាងនេះ ព្រោះកន្លងមកបុគ្គលិកគាត់កត់គីឡូខ្វះ ចឹងហើយបានជាពេលនេះគាត់ស្រាវជ្រាវទៅឃើញប្រើអស់ប៉ុណ្ណឹង។ គាត់ពន្យល់ថា ករណីនេះ កើតឡើងពីបុគ្គលិកគាត់ ដែលអ្នកដើរកត់កុងទ័រទឹកតាមផ្ទះ​ គាត់ធ្វើការប្រហែស ដោយមិនបានចុះស្រង់កុងទ័រទឹកតាមផ្ទះរបស់អតិថិជនតាមផ្ទះទេ តែបែរជាចេញវិក្កយបត្រស្មានៗ រយៈពេល២ឆ្នាំមកហើយ។ ហេតុនេះ ទើបគាត់ចេញវិក្កយបត្រសរុបឃើញត្រូវបង់ ៤លានរៀលជាង!។ គាត់ថា បុគ្គលិកគាត់ស្មានៗគីឡូហើយកត់ ទើបគីឡូវាឡើងច្រើនជាន់គ្នា៕

អត្ថបទ៖ វីរៈ