ត្រឹម១ថ្ងៃ នគរបាលទាំង១៤ខណ្ឌក្នុងរាជធានីភ្នំពេញ បានផ្ដល់សេវាអត្តសញ្ញាណប័ណ្ណជូនពលរដ្ឋជាង៦០០នាក់

កាលពីថ្ងៃទី១៨ ខែធ្នូ ឆ្នាំ២០២៤ កម្លាំងប៉ុស្ដិ៍នគរបាលរដ្ឋបាលទាំង១០៥ នៅតាមបណ្ដាខណ្ឌទាំង១៤ ក្នុងរាជធានីភ្នំពេញ បានផ្ដល់សេវាធ្វើអត្តសញ្ញាណប័ណ្ណជូនពលរដ្ឋសរុបជាង៦០០ប័ណ្ឌ និងសេវាសាធារណៈផ្សេងៗទៀត។

យុទ្ធនាការនេះ អនុវត្តតាមទិសដៅការងាររបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ តម្រូវឲ្យបណ្តាអធិការដ្ឋាននគរបាលខណ្ឌទាំង១៤ និងប៉ុស្ដិ៍រដ្ឋបាលទាំង១០៥ ត្រូវពង្រឹងអនុវត្តភារកិច្ចការងារបម្រើសេវាសាធារណៈជូនប្រជាពលរដ្ឋ ជាពិសេសសេវាលើការងារផ្តល់អត្តសញ្ញាណប័ណ្ណ សៀវភៅគ្រួសារ(ក៤) សៀវភៅស្នាក់នៅ(ក២)។

ក្នុងយុទ្ធនាការសេវាសាធារណៈនេះ មន្រ្តីនគរបាលជំនាញនៃស្នងការដ្ឋាននគរបាលរាជធានីភ្នំពេញ ក៏ដូចជាមន្រ្តីតាមបណ្ដាមូលដ្ឋានទាំង១៤ខណ្ឌ និងប៉ិស្តិ៍រដ្ឋបាលទាំង១០៥ បានអំពាវនាវឱ្យជនគ្រប់អាយុ និងពលរដ្ឋមានអត្តសញ្ញាណប័ណ្ណផុតសុពលភាព និងនៅសល់សុពលភាពរយៈពេល១៨០ថ្ងៃ/៦ខែ ឬសៀវស្នាក់នៅ សៀវគ្រួសារជាដើម សូមនាំគ្នាទៅបំពេញឱ្យបានគ្រប់គ្នា ដើម្បីទទួលបានអត្តសញ្ញាណប័ណ្ណសញ្ជាតិខ្មែរថ្មី ឬសៀវស្នាក់នៅ សៀវភៅគ្រួសារជាដើម សម្រាប់ប្រើប្រាស់តាមតម្រូវការ។

សូមបញ្ជាក់ថា ការផ្កល់សេវាសាធារណៈជូនពលរដ្ឋជាង៦០០ប័ណ្ណនេះរួមមាន ទី ១.បានផ្តល់សេវាធ្វើអត្តសញ្ញាណប័ណ្ណ សរុបចំនួន៦៦៤នាក់ (ផ្តល់ឡើងវិញ ចំនួន៥៩២នាក់ និងផ្តល់ថ្មីចំនួន៧២នាក់។ ទី២. ផ្តល់សៀវភៅស្នាក់នៅថ្មី ១៦គ្រួសារ និងទុតិយតាសៀវភៅស្នាក់នៅ ៧៤គ្រួសារ, ទី៣ ផ្តល់សៀវភៅគ្រួសារថ្មី ៤០គ្រួសារ និងទុតិយតាសៀវភៅគ្រួសារ ២០គ្រួសារ។

គួរបញ្ជាក់បន្ថែមថា ការផ្តល់សេវាលើការធ្វើអត្តសញ្ញាណប័ណ្ណ សៀវស្នាក់នៅ និងសៀវភៅគ្រួសារនេះ នគរបាលនៅតាមបណ្តាមូលដ្ឋានប៉ុស្តិ៍រដ្ឋបាលទាំងអស់ក្នុងរាជធានីភ្នំពេញ តែងយកចិត្តទុកដាក់ជានិច្ច ក្នុងការចុះធ្វើជាប្រចាំ ពិសេសក្រោយពេលធ្វើរួចរាល់ ឯកសារទាំងនោះ នឹងត្រូវបានយកទៅជូនដោយផ្ទាល់ដល់តាមខ្នងផ្ទះរបស់ពលរដ្ឋផងដែរ៕

អត្ថបទ៖ សុភា