ស្ពានអាកាស មរតកតេជោ ជាន់ទី១បើកឲ្យដំណើរការបណ្តោះអាសន្នដើម្បីសម្រួលលំហូរចរាចរណ៍

បច្ចុប្បន្ននេះ ស្ពានអាកាស «មរតកតេជោ» ជាន់ទី១ នៅផ្នែកមួយចំនួនត្រូវបានអនុញ្ញាតបើកឱ្យដំណើរការចរាចរណ៍ជាបណ្តោះអាសន្នហើយ ពោលគឺតាមផ្នែកខ្លះៗ ដើម្បីជួយសម្រួលដល់លំហូរចរាចរណ៍ ខណៈក្រុមការងារបច្ចេកទេសជំនាញ ក៏កំពុងបន្តពន្លឿនក្នុងការសាងសង់។

ការអនុញ្ញាតឱ្យប្រើប្រាស់បណ្តោះអាសន្ននេះ គឺសម្រាប់តែលំហូរចរាចរណ៍ធ្វើដំណើរពីទិសដៅមកពីមហាវិថីព្រះមុនីវង្ស ឡើងទៅកាន់ចំណុចរង្វង់មូល នៃស្ពានអាកាសជាន់ទី១ បន្តឆ្ពោះសំដៅទៅមហាវិថីកងយោធពលខេមរភូមិន្ទ 271 និងមួយទិសទៀត ឆ្ពោះទៅស្ពានអាកាសក្បាលថ្នល់ ចំណែកផ្នែកជាច្រើនទៀត នឹងអនុញ្ញាតឲ្យប្រើប្រាស់ជាបន្តបន្ទាប់។

ប្រជាពលរដ្ឋជាអ្នកដំណើរបានបង្ហាញភាពរីករាយពេលបានប្រើប្រាស់សមិទ្ធផលថ្មីស្ពានអាកាស មរតកតេជោ នេះ ដោយស្ពានអាកាសនេះ បានជួយសម្រួលដល់ការធ្វើដំណើរទៅមករបស់ពួកគាត់បានលឿនរហ័សមិនចំណាយពេល និងអាចបញ្ចៀសបានពីការកកស្ទះចរាចរណ៍ ដែលកន្លងទៅតែងរំខាន់ដល់ការធ្វើដំណើរពេលមកដល់ចំណុចនេះ និងប៉ះពាល់ដល់ពេលវេលាធ្វើដំណើររបស់ពលរដ្ឋទូទៅ។

សិស្សនិស្សិតដែលឧស្សាហ៍ធ្វើដំណើរឆ្លងកាត់តំបន់នេះបានលើកឡើងថា កន្លងទៅការធ្វើដំណើរឆ្លងចំណុចនេះ គឺមានការកក់ស្ទះចរាចរណ៍យ៉ាងខ្លាំង ខាតពេលវេលា ពេលធ្វើដំណើរមកសាលាត្រូវមកមុនម៉ោង ដោយគិតថា ត្រូវចំណាយពេលវេលាកកស្ទះចរាចរណ៍នេះតំបន់។ ក្រោយមានស្ពានអាកាសនេះឡើងជារូបរាង ពិតជាកាត់បន្ថយការកកស្ទះបានច្រើនចំណេញពេលវេលា។ បន្ថែមទៀតនោះស្ពានអាកាសមរតកតេជោ មានហេដ្ឋារចនាសម្ព័ន្ធស្អាត ប្លែកពីស្ពានអាកាសមុនៗ ដោយស្ពាននេះ មានរង្វង់មូលនៅជាន់ទី១ មើលទៅពិតស្អាត។

សូមបញ្ជាក់ថា ស្ពានអាកាស «មរតកតេជោ»ជំហានទី២នេះ គ្រោងនឹងបញ្ចប់ការសាងសង់មុនផែនការដែលនៅ​សល់​តែ១០៩ថ្ងៃទៀតប៉ុណ្ណោះ ពោលគឺនឹងបញ្ចប់មុនពិធីបុណ្យចូលឆ្នាំខ្មែរប្រពៃណីជាតិខ្មែរ ឆ្នាំ២០២៥។

ស្ពានអាកាស “មរតកតេជោ” បានដំណើរការបើកការដ្ឋានសាងសង់កាលពីថ្ងៃទី៣១ ខែសីហា ឆ្នាំ២០២២កន្លងទៅ ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចអគ្គមហាសេនាបតី តេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា។ ស្ពានអាកាសនេះ ទទួលការសាងសង់ដោយក្រុមហ៊ុនវិនិយោគទុនអាណិកជនកម្ពុជា ( OCIC ) ដោយគ្រោងចំណាយថវិការសាងសង់សរុប ជាង៣៦លានដុល្លារអាមេរិក៕

អត្ថបទ៖ សុភា