សន្តិសុខសង្គម

អាជ្ញាធរខណ្ឌចំការមន បន្តទប់ស្កាត់ និងបង្ក្រាបក្រុមក្មេងទំនើងប្រមូលផ្ដុំគ្នា ក្នុងបរិវេណកោះពេជ្រ

បានផុស

៣ ខែ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

កម្លាំងគណៈបញ្ជាការឯកភាពខណ្ឌចំការមន រួមជាមួយកម្លាំងអធិការដ្ឋាននគរបាលខណ្ឌ បានធ្វើការចុះល្បាតក្នុងបរិវេណកោះពេជ្រ ដើម្បីទប់ស្កាត់ការប្រមូលផ្ដុំគ្នា ជៀសវាងបង្កជាជម្លោះដេញកាប់ចាក់គ្នាបណ្ដាលឲ្យមានភាគីម្ខាងរងរបួស ឬ បាត់បង់អាយុជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយអនុវត្តតាមបទបញ្ជា លោក ឃួង ស្រេង អភិបាលរាជធានីភ្នំពេញ ណែនាំឲ្យគណៈបញ្ជាការឯកភាពខណ្ឌទាំង ១៤ ខណ្ឌ ត្រូវយកចិត្តទុកដាក់ឲ្យបានខ្ពស់ចំពោះក្រុមក្មេងទំនើងនៅតាមទីសាធារណៈតែងបង្កបញ្ហាក្នុងភូមិសាស្ត្ររាជធានីភ្នំពេញ កាលពីយប់ថ្ងៃទី ២៥ ខែធ្នូ ឆ្នាំ ២០២៥ ម្សិលមិញនេះ កម្លាំងគណៈបញ្ជាការឯកភាពខណ្ឌចំការមន បានចុះធ្វើការល្បាតក្នុងបរិវេណកោះពេជ្រ ដោយត្រួតពិនិត្យមើលក្រុមក្មេងទំនើងដែលតែងអង្គុយប្រមូលផ្ដុំគ្នា។

រង្វង់ប្រតិបត្តិការខាងលើកម្លាំងអាជ្ញាធរបានធ្វើការត្រួតពិនិត្យ និងណែនាំអប់រំក្រុមក្មេងទំនើងទាំងនោះ រួចឲ្យត្រឡប់ទៅផ្ទះវិញ។ ប្រសិនបើធ្វើការត្រួតពិនិត្យឃើញដាវ ឬក៏វត្ថុផ្សេងៗ ដែលអាចបង្កគ្រោះថ្នាក់ កម្លាំងសមត្ថកិច្ច នឹងនាំយកទៅសួរនាំនៅប៉ុស្តិ៍នគរបាលរដ្ឋបាល។

គួរបញ្ជាក់ថា ចំពោះក្មេងទំនើង គណៈបញ្ជាការឯកភាពខណ្ឌទាំង ១៤ ត្រូវតែបន្តបង្ក្រាបឲ្យខ្លាំងក្លា ធ្វើយ៉ាងណាឲ្យភូមិ-សង្កាត់ មានសុវត្ថិភាព បង្កភាពកក់ក្ដៅដល់ប្រជាពលរដ្ឋ ទៅតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា៕

អត្ថបទ ៖ ម៉េង