អភិបាលខេត្តកែបណែនាំអាជ្ញាធរពាក់ព័ន្ធពង្រឹង​ការពារសុវត្ថិភាពជូនពលរដ្ឋ និងភ្ញៀវទេសចរមកកម្សាន្តក្នុងឱកាសបុណ្យឆ្លងឆ្នាំសកល

លោក សោម ពិសិដ្ឋ អភិបាលនៃគណៈអភិបាលខេត្តកែប បានណែនាំឲ្យអាជ្ញាធរ មន្ទីរ អង្គភាព ពាក់ព័ន្ធ ត្រូវពង្រឹងការពារសុវត្ថិភាពជូនប្រជាពលរដ្ឋ និងភ្ញៀវទេសចរដែលមកលេងកម្សាន្ដនៅក្នុងឱកាសបុណ្យឆ្លងឆ្នាំសកលខាងមុខនេះ។ ការណែនាំនេះ បានធ្វើឡើងនៅក្នុងកិច្ចប្រជុំបូកសរុបលទ្ធផលការងារប្រចាំខែធ្នូ និងលើកទិសដៅអនុវត្តការងារបន្តបន្ទាប់ដើម្បីសេចក្តីព្រាងរបាយការណ៍បូកសរុបលទ្ធផលប្រចាំឆ្នាំ២០២៤ និងលើកទិសដៅអនុវត្តការងារប្រចាំឆ្នាំ២០២៥ កាលពីថ្ងៃទី២៦ ខែធ្នូ ឆ្នាំ២០២៤។

លោក សោម ពិសិដ្ឋ បានធ្វើការណែនាំដល់អាជ្ញាធរ និងមន្ទីរអង្គភាពពាក់ព័ន្ធទាំងអស់ នៅក្នុងឱកាសបុណ្យចូលឆ្នាំសកល ឆ្នាំ២០២៤ ចូលឆ្នាំ២០២៥ ត្រូវធ្វើការត្រួតពិនិត្យទៅលើតម្លៃក្នុងការលក់ចេញ និងណែនាំដល់អាជីវករ និងប្រតិបត្តិករ ត្រូវមានបញ្ជីមុខម្ហូបឬសេវា អោយបានត្រឹមត្រូវ គ្រប់ទីតាំងទាំងអស់ ដើម្បីផ្ដល់នូវផាសុខភាព ភាពជឿជាក់ និងភាពសប្បាយរីករាយជូនអ្នកទេសចរ ជាពិសេស អាជ្ញាធរគ្រប់លំដាប់ថ្នាក់ ត្រូវពង្រឹងការការពារ សន្ដិសុខ សុវត្ថិភាព សណ្ដាប់ធ្នាប់សារធារណៈ ជូនប្រជាពលរដ្ឋ និងភ្ញៀវទេសចរ អោយមានភាពសប្បាយរីករាយនាឱកាសនោះ។

ជាមួយគ្នានោះលោកអភិបាលខេត្តកែបបានធ្វើការណែនាំដល់មន្ទីរពាក់ព័ន្ធទាំងអស់ រៀបចំបង្កើននូវភាពសប្បាយរីករាយជូនដល់ប្រជាពលរដ្ឋ និងភ្ញៀវទេសចរជាតិ និងភ្ញៀវទេសចរអន្តរជាតិដែលបានមកលម្ហែលេងកម្សាន្ដក្នុងខេត្តកែបនាឱកាសបុណ្យឆ្លងឆ្នាំសកលខាងមុខ។

រដ្ឋបាលខេត្តកែបបានរៀបចំតុបតែងកែលម្អភ្លើងបំភ្លឺតាមសួនសាធារណៈឆ្នេរលេងទឹកស្រី ស បានត្រៀមលក្ខណៈរួចរាល់ដោយបានបង្កើតព្រឹត្តិការណ៍សប្បាយៗ រយៈពេល២ថ្ងៃ ចាប់ពីថ្ងៃទី៣០ ដល់ថ្ងៃទី៣១ ខែធ្នូ ឆ្នាំ២០២៤ និងយប់រាត្រីឆ្លងចូលឆ្នាំ២០២៥ក្នុងនោះមានដូចជា ពិធីបង្ហោះខ្លែងខ្មែរ ប្រឡងច្រៀងបុរាណ សម័យ ពិធីអំទូកផ្ដាចារសមុទ្រ ប្រគុំតន្ដ្រី សិល្បៈ ល្ខោនបាសាក់ អុចកាំជ្រួច និងបង្ហោះគោម ជាដើមផងដែរ៕

អត្ថបទ៖ សឹង រ៉ាត់