ស្នងការរាជធានីបង្ហាញមុខជនសង្ស័យ២៥នាក់ពាក់ព័ន្ធករណីឃាតកម្ម ក្មេងទំនើង និងចោរកម្ម

កាលពីរសៀលថ្ងៃទី១ ខែមករា ឆ្នាំ២០២៥ កម្លាំងសមត្ថកិច្ចបានបញ្ជូនខ្លួនក្រុមជនសង្ស័យចំនួន ២៥នាក់មកពីតាមបណ្ដាខណ្ឌនានាក្នុងភូមិសាស្ត្ររាជធានីភ្នំពេញ មកបង្ហាញមុខជាសាធារណៈពាក់ព័ន្ធករណីឃាតកម្ម លួច ឆក់ ប្លន់ និងក្មេងទំនើងមុនពេលបញ្ជូនបន្តទៅអនុវត្តតាមនីតិវិធីច្បាប់។

សូមបញ្ជាកថា ក្រុមជនសង្ស័យទាំង២៥នាក់នេះ ត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលតាមបណ្ដាខណ្ឌនានាក្នុងភូមិសាស្ត្ររាជធានីភ្នំពេញ ស្រាវជ្រាវឃាត់ខ្លួនជាបន្តបន្ទាប់ក្រោយពីធ្វើសកម្មភាពរួចដូចជា ករណីឃាតកម្ម១ករណី ឃាត់ខ្លួន២នាក់ (ប្រើដុំថ្មគប់មនុស្សបណ្តាលឲ្យស្លាប់), ករណីលួច៩ករណី ឃាត់ខ្លួន៩នាក់ (លួចម៉ូតូ៣ករណី លួចសម្ភារៈ និងទ្រព្យសម្បត្តិ ៥ករណី), ករណីហិង្សាដោយចេតនា៣ករណី ឃាត់ខ្លួន៩នាក់ និងធ្វើឲ្យខូចខាតដោយចេតនា (កាប់យកស្លាកលេខម៉ូតូ) ១ករណី ឃាត់ខ្លួន៦នាក់ (ក្រុមក្មេងទំនើង)។

ជនសង្ស័យទាំងអស់ត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់។

លោកវរសេនីយឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានឲ្យដឹងថា ជុំវិញការបង្ក្រាបទប់ស្កាត់ក្មេងទំនើងនេះ លោក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញបានយកចិត្តទុកដាក់ និងបានដាក់ចេញនូវវិធានការយ៉ាងតឹងរ៉ឹងបំផុត។ អ្នកនាំពាក្យបន្ថែមថា ក្នុងឆ្នាំ២០២៥នេះ លោកស្នងការក៏បានដាក់ចេញនូវវិធានការដើម្បីបង្ការទប់ស្កាត់ក្មេងទំនើងដូចជា ១.អនុវត្តវិធានការផ្សព្វផ្សាយដល់អាណាព្យាបាល និងតាមសាលារៀន, ២.អនុវត្តនូវជំនាញចុះរដ្ឋបាលតាមមូលដ្ឋាន និងកំណត់មុខសញ្ញា ៣ ប្រើវិធានការច្បាប់ បន្តស្រាវជ្រាវបង្ក្រាបឲ្យដល់ឫសគល់តែម្តង៕

អត្ថបទ៖ ម៉េង