សន្តិសុខសង្គម

យុវជនម្នាក់ ជិះម៉ូតូឡើងលើស្ពានជ្រោយចង្វារ រួចលោតទឹកសម្លាប់ខ្លួន

បានផុស

២ សប្តាហ៍ មុន

នៅ

ថ្ងៃចន្ទ ៦ មករា ២០២៥

ដោយ

អ៊ិន ពិសី

យុវជនម្នាក់ បានជិះម៉ូតូឡើងស្ពានជ្រោយចង្វារ រួចផ្ដួលម៉ូតូចោល ហើយលោតទឹកសម្លាប់ខ្លួនបានសម្រេច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១០ យប់ ថ្ងៃទី ៥ ខែមករា ឆ្នាំ ២០២៤ នៅលើស្ពានជ្រោយចង្វារមិត្តភាពកម្ពុជា-ជប៉ុន សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញយុវជនម្នាក់ ជិះម៉ូតូម៉ាកហុងដាឌ្រីមសេ ១២៥ ពណ៌ខ្មៅ ពុំមានស្លាកលេខនោះទេ ដោយធ្វើដំណើរឡើងស្ពានជ្រោយចង្វារ មិត្តភាពកម្ពុជា-ជប៉ុន ទិសដៅពីលិចទៅកើត។ លុះមកដល់ចំណុចកើតហេតុ យុវជនខាងលើ បានផ្ដួលម៉ូតូខ្លួនចោល រួចដោះមួកការពារចេញ ហើយឡើងបង្កាន់ដៃស្ពាន ធ្វើសកម្មភាពលោតទឹកសម្លាប់ខ្លួនតែម្ដង។

ជាក់ស្ដែងនៅកន្លែងកើតហេតុគេឃើញនៅសល់តែម៉ូតូ ១ គ្រឿង មួកការពារ និងស្បែកជើង ១ គូ តែប៉ុណ្ណោះ ចំណែកមនុស្សបានលិចទៅក្នុងទឹកទន្លេបាត់រកមិនឃើញនោះទេ។ ចំណែកនៅក្នុងអត្តសញ្ញាណប័ណ្ឌរបស់បុរសដែលលោតទឹកមានឈ្មោះ ប៉ក់ ណិត អាយុ ២៤ ឆ្នាំ មានទីលំនៅភូមិមោងឬស្សី ខេត្តបាត់ដំបង។ ចំពោះមូលហេតុ នៃការលោតនេះ មិនទាន់មានអ្នកដឹងនោះទេ។

ក្រោយពេលកើតហេតុ ពលរដ្ឋបានរាយការណ៍ទៅកាន់សមត្ថកិច្ចមូលដ្ឋាន ដើម្បីឡើងមកស្ពានយកម៉ូតូរបស់ជនរងគ្រោះ និងសម្ភារៈផ្សេងៗ ទៀត ទៅរក្សាទុកនៅប៉ុស្តិ៍នគរបាលរដ្ឋបាលជ្រោយចង្វារ រង់ចាំប្រគល់ជូនក្រុមគ្រួសារជនរងគ្រោះនៅពេលក្រោយ៕

អត្ថបទ ៖ សំណាង