សន្តិសុខសង្គម

រថយន្ត ១ គ្រឿង ដឹកបុរសម្នាក់ ទម្លាក់ចោលមុខវត្តទួលសុភាឃួន ព្រឹកឡើងប្រទះឃើញស្លាប់បាត់បង់ជីវិត

បានផុស

៤ សប្តាហ៍ មុន

នៅ

ថ្ងៃសុក្រ ១០ មករា ២០២៥

ដោយ

សពបុរសម្នាក់ ត្រូវបានលោកមេភូមិប្រទះឃើញដេកស្លាប់នៅជាប់ខ្លោងទ្វារវត្តទួលសុភាឃួន រួចរាយការណ៍ទៅសមត្ថកិច្ចចុះពិនិត្យជាក់ស្ដែង បង្កឲ្យមានការភ្ញាក់ផ្អើលកាលពីវេលាម៉ោង ៨ និង ១៥ នាទីព្រឹក ថ្ងៃទី ១០ ខែមករា ឆ្នាំ ២០២៥ ស្ថិតនៅភូមិព្រៃទា ២ សង្កាត់ចោមចៅទី ៣ ខណ្ឌពោធិ៍សែនជ័យ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សពបុរសខាងលើមិនទាន់ស្គាល់អត្តសញ្ញាណនៅឡើយនោះទេ ដោយមានអាយុប្រហែលជាង ៣០ ឆ្នាំ សម្បុរខ្មៅ ស្លៀកខោខោវប៊យពណ៌ទឹកប៊ិចជើងវែង ពាក់អាវដៃវែងពណ៌សឆ្នូតខ្មៅ។

យោងតាមកាមេរ៉ាសុវត្ថិភាពដែលបំពាក់នៅមុខខ្លោងទ្វារវត្តបានបង្ហាញឲ្យឃើញនៅវេលាម៉ោង ៩ និង ៣០ នាទីយប់ ថ្ងៃទី ៩ ខែមករា ឆ្នាំ ២០២៥ មានរថយន្ត ១ គ្រឿង ពណ៌ទឹកប្រាក់ មិនចាំស្លាកលេខ និងម៉ាក បានដឹកបុរសខាងលើនេះមកទុកចោល ខណៈរូបគាត់នៅមានដង្ហើម និងនៅកម្រើកដៃជើងបាននៅឡើយ។

លុះព្រឹកឡើងទើបលោកមេភូមិដើរបោសសំរាមនៅវត្ត ក៏ប្រទះឃើញបុរសខាងលើនេះដេកស្លាប់ខាងក្រោយរូបតោថ្ម មុខខ្លោងទ្វារវត្ត បង្កឲ្យមានការភ្ញាក់ផ្អើល រាយការណ៍បន្តទៅកាន់សមត្ថកិច្ចប៉ុស្តិ៍នគរបាលប៉ុស្តិ៍រដ្ឋបាលសង្កាត់ចោមចៅទី ៣ ចុះមកធ្វើការហ៊ុមព័ទ្ធនៅទីតាំងកើតហេតុខាងលើ និងសហការជាមួយកម្លាំងជំនាញនគរបាលខណ្ឌពោធិ៍សែនជ័យ និងកម្លាំងជំនាញការិយាល័យកោសល្យវិច័យ និងបច្ចេកទេស នៃស្នងការដ្ឋាននគរបាលរាជធានីភ្នំពេញ ចុះមកពិនិត្យសព៕

អត្ថបទ ៖ សុខា