នគរបាលខណ្ឌច្បារអំពៅ ឃាត់ខ្លួនជនសង្ស័យ២​នាក់ ក្រោយកាប់បំផ្លាញម៉ូតូមួយគ្រឿង នៅសង្កាត់ច្បារអំពៅទី២(មានវីដេអូ)

ដោយមានការយកចិត្តទុកដាក់ពីគណៈបញ្ជាការឯកភាពរដ្ឋបាលខណ្ឌ អធិការនៃអធិការដ្ឋាននគរបាលខណ្ឌច្បារអំពៅ លោក ម៉ៅ សឿត បានដឹកនាំកម្លាំងជំនាញ ស្រាវជ្រាវរហូតឈានដល់ការឃាត់ខ្លួនជនដៃដល់ ក្នុងករណីកាប់បំផ្លាញម៉ូតូចំនួន១នាក់ និងបក្ខពួកចំនួន១នាក់ នៅវេលាម៉ោង៨និង៥០នាទី ថ្ងៃទី១៤ ខែមករា ឆ្នាំ២០២៥នេះ។

សូមបញ្ជាក់ថា កាលពីយប់ថ្ងៃទី១៣ ខែមករា ឆ្នាំ២០២៥ ម៉ោង២១និង២០នាទី មានករណីកាប់បំផ្លាញម៉ូតូម៉ាក Honda Scoopy ពណ៌ក្រហម បណ្តាលឱ្យខូតខាត ប៉ុន្តែពុំបណ្តាលឱ្យជនរងគ្រោះជាបើកបរម៉ូតូរងរបួសនោះទេ។

ករណីនេះ កើតឡើងនៅមុខផ្សារច្បារអំពៅ តាមបណ្តោយផ្លូវលេខ៣៦៩ ស្ថិតក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅ។

សមត្ថកិច្ចបានឲ្យដឹងថា ជនដៃដល់មានឈ្មោះ ប៉ាវ ស៊ីណា ចំណែកបក្ខពួកឈ្មោះ លន់ វិល្លៀម ។ បច្ចុប្បន្នកម្លាំងជំនាញ បាននិងកំពុងស្វែងរកឃាត់ខ្លួនក្រុមជនបង្កបន្តទៀត៕

អត្ថបទ៖ នរា