អ្នកនេសាទថា មានការលួចនាំចូលក្ដាមសេះពីប្រទេសជិតខាង ធ្វើឲ្យតម្លៃក្ដាមដែលពួកគាត់​ខំរក​ធ្លាក់ចុះ

លោក ភឿន ផល្លា នាយរងខណ្ឌរដ្ឋបាលជលផលខេត្តកែប នៅថ្ងៃទី១៥ ខែមករា ឆ្នាំ២០២៥នេះ បានដឹកនាំមន្ត្រីជំនាញជលផល នៃមន្ទីរកសិកម្ម រុក្ខាប្រមាញ់ និងនេសាទខេត្ត ចុះពិនិត្យការលក់គ្រឿងសមុទ្រ ជាពិសេសក្ដាមសេះ បន្ទាប់ពីប្រជានេសាទមួយចំនួនលើកឡើងថាមានលួចនាំចូលពីប្រទេសជិតខាង ធ្វើឲ្យតម្លៃក្ដាមដែលពួកគាត់នេសាទបានធ្លាក់ថ្លៃ។

ការចុះពិនិត្យនេះ គឺបន្ទាប់ពីមន្ត្រីជលផលបានចុះជួបប្រជានេសាទ និងបានលើកឡើងថា មានឈ្មួញលួចនាំចូលក្តាមពីប្រទេសវៀតណាមហួសហេតុ ធ្វើឲ្យតម្លៃក្តាមដែលពួកគាត់ខំរកមកនោះលក់បានតម្លៃធ្លាក់ទាប។ តែបើតាមការសួរនាំពីមន្ត្រីជលផល ក្រុមអាជីវករបានឆ្លើយថា ក្ដាមសេះដែលដាក់លក់ក្នុងផ្សារក្ដាមនេះ គឺសុទ្ធតែក្ដាមដែលទិញពីទូកប្រជាអ្នកនេសាទផ្ទាល់ទាំងអស់ តែដោយសារទំហំ និងផលក្តាមច្រើនទើបធ្វើឲ្យតម្លៃក្ដាមក្នុងមួយរយៈនេះធ្លាក់ចុះ។

ក្នុងជំនួបជាមួយមន្ត្រីជំនាញ ក្រុមប្រជានេសាទបានលើកឡើងថា រយៈពេលជាង១ឆ្នាំមកនេះមានការនាំចូលក្តាមមកពីបណ្តាប្រទេសជិតខាង ជាហេតុធ្វើឲ្យក្តាមដែលអ្នកនេសាទបានធ្លាក់ថ្លៃពី៣ម៉ឺនរៀល មកត្រឹមជាង១ម៉ឺនរៀល ក្នុងមួយគីឡូក្រាម(ក្តាមមិនទាន់ញែកទំហំ)។

ប្រជាអ្នកនេសាទបានបន្តឱ្យដឹងថា ក្តាមសេះដែលនាំចូលពីវៀតណាមមានទំហំធំៗជាងក្តាមក្នុងសមុទ្រកែប ជាហេតុធ្វើអោយការប្រកួតប្រជែងមានភាពពិបាកខ្ពស់។

អ្នកស្រី ស្រីពៅ ជាអាជីវករលក់គ្រឿងសមុទ្រនៅផ្សារក្តាម បានប្រាប់ឱ្យដឹងថា ក្តាមសេះដែលអ្នកស្រីកំពុងលក់នេះ គឺប្រមូលទិញផ្ទាល់ពីប្រជាអ្នកនេសាទនៅផែក្តាមជាប់ផ្សាររាត្រីក្រុងកែប ខេត្តកែប ផ្ទាល់តែម្ដង ហើយអ្នកស្រីបញ្ជាក់ដែរថា ការឱ្យតម្លៃក្តាម គឺទៅតាមទំហំរបស់ក្តាម បើក្តាមធំភាគច្រើនអ្នកស្រីទិញពីប្រជាអ្នកនេសាទក្នុងតម្លៃ ២៥ ០០០រៀល ទៅ៣០ ០០០រៀលក្នុងមួយគីឡូក្រាម។

លោក ភឿន ផល្លា នាយរងខណ្ឌរដ្ឋបាលជលផលខេត្តកែបបានបញ្ជាក់ឱ្យដឹងដែរថា កន្លងទៅក៏ធ្លាប់មាននការលួចនាំយកផលក្តាមសេះពីតំបន់ដទៃយកមកលក់មែន តែក្នុងចំនួនតិចតូចប៉ុណ្ណោះ។ ទោះជាយ៉ាងណាលោកនាយរងខណ្ឌរដ្ឋបាលជលផលខេត្តកែប បានសំណូមពរទៅដល់បណ្តាអាជីវករទាំងអស់ ត្រូវថែរក្សាកេរ្តិ៍ឈ្មោះក្តាមកែប ឱ្យបាននៅគង់វង្សតាមរយៈលក់ផលក្តាមដែលនេសាទបានដោយប្រជានេសាទក្នុងខេត្តកែបរបស់យើងទៅថ្ងៃមុខ៕

អត្ថបទ៖ សឹង រ៉ាត់