ស្ត្រីម្នាក់ ជួយលក់ឡេ ​បន្លំលួចលុយម្ដងបន្តិចៗ រហូត​បាន​ជាង១ម៉ឺនដុល្លារ ​ត្រូវ​ម្ចាស់​លុយ​ប្ដឹង​ឱ្យ​សមត្ថកិច្ច​ឃាត់ខ្លួន​

បន្ទាយមានជ័យ ៖ ស្ត្រីម្នាក់​ជួយទិញ​ឡេ​ រហូត​បាន​ស្គាល់​គ្នា​ក្លាយ​ជា​មិត្ត​សំឡាញ់​រាប់អានគ្នា​ដូចបងប្អូន​បង្កើតជាមួយអ្នកលក់ ក៏មានគំនិត​លក់​កាហ្វេ​នៅ​មុខ​តូប​លក់​ឥវ៉ាន់​ឡេ ​ដើម្បីឆ្លៀត​ឱកាស​បន្លំ​លួចលុយ​ក្នុង​ថត​តុ​ម្ដងបន្តិចៗ រហូត​បាន​ដល់​ជាង១ម៉ឺនដុល្លារ។

យោង​តាម​ពាក្យ​បណ្ដឹង​របស់​ស្រី​ម្ចាស់​លុយ ឈ្មោះ នឿន វន្នី ភេទស្រី អាយុ៤៣ឆ្នាំ រស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានរៀបរាប់នៅ​ក្នុង​ពាក្យ​បណ្តឹងថា “ខ្លួនបានស្គាល់គ្នាជា ឈ្មោះ ឡម ចិន្ដា អស់រយៈពេលជាងមួយឆ្នាំកន្លងមកហើយ ព្រោះឈ្មោះ ឡម ចិន្ដា ជាអ្នកលក់ផលិតឡេលាបខ្លួនតាមអនឡាញ ដែល​ខ្លួនបានទិញឡេពីឈ្មោះ ឡម ចិន្ដារហូតបានស្គាល់គ្នាក្លាយជាមិត្តសំឡាញ់រាប់អានគ្នាដូចបងប្អូនបង្កើត ហើយចេញ ចូលផ្ទះរបសគេតាមចិត្តហើយបានដើរលេងកម្សាន្តជាមួយជាញឹកញាប់ ។ ខ្លួន​បាន​ផ្ញើ​កាបូបលុយជាមួយឈ្មោះ ឡម ចិន្ដា នៅពេលខ្លួនចូលបន្ទប់ទឹក ស្រាប់​តែ​ក្នុងកាបូប​បាត់​លុយ​ម្តង៥.០០០បាត ទៅ៦.០០០បាត តែ​ខ្លួន​មិន​ចាប់​អារម្មណ៍ គ្រាន់​តែ​មាន​ការ​សង្ស័យ  រហូត​ដល់​កំឡុង​ខែកញ្ញា ឆ្នាំ២០២៤ ឈ្មោះ ឡម ចិន្ដា មក​សុំ​លក់​កាហ្វេ​នៅ​មុខ​តូប​លក់​ឥវ៉ាន់របស់ខ្លួន ព្រមទាំងសន្យាជួយលក់ឥវ៉ាន់​ឱ្យដោយមិនគិតថ្លៃឈ្នួល បន្ទាប់​មក​ក៏សម្រេចចិត្ត​ឱ្យលក់ជាមួយដោយគិតថា ជាអ្នករាប់អានគ្នាផង លុះដល់ថ្ងៃទី១ ខែវិច្ឆិកា ឆ្នាំ២០២៤ ខ្លួនបានយកប្រាក់ចំនួន១.០០០ដុល្លារ និងប្រាក់ថៃ១០០០បាត មកដាក់​ក្នុង​ថតតុគិតលុយនៅក្នុងតូបលក់ឥវ៉ាន់​ដើម្បី​ទុកសងគេ រហូតដល់វេលាម៉ោង៤រសៀល ខ្លួនក៏បានទៅបើកថតតុយកលុយនោះស្រាប់តែបាត់អស់ ហើយខ្លួនបានសួរទៅឈ្មោះ ឡម ចិន្ដា ពេលនោះគេឆ្លើយថាមិនដឹងដោយគ្មានផស្តុតាងក៏ហីទៅ។

ក្រោយ​មក​ទៀត ឈ្មោះ ឡម ចិន្ដា បាន​បបួល​ទៅ​លេង​នៅ​ក្រុងប៉ោយប៉ែត ពេល​ត្រឡប់​មក​វិញ មិនឃើញឈ្មោះ ឡម ចិន្ដា មកលក់កាហ្វេនៅមុខតូប​ទៀត​ទេ ដោយមានការសង្ស័យ បានឆែកមើលកាមេរ៉ាសុវត្ថិភាពស្រាប់តែឃើញឈ្មោះ ឡម ចិន្ដា ធ្វើសកម្មភាពលួចយកប្រាក់របស់​ដែល​ទុក​ក្នុង​ថត​តុ​នៅ​ក្នុង​ផ្ទះ​ជា​ប្រចាំ សរុប​ជា​ប្រាក់​ដែល​បាត់​អស់​ប្រហែល​១ម៉ឺនដុល្លារ ទើប​មក​ដាក់​ពាក្យបណ្ដឹងនៅមូលដ្ឋានកងរាជអាវុធហត្ថក្រុងតែម្ដង។

លោក​វរសេនីយ៍ត្រី សុខ ឡេង មេបញ្ជាការ​មូលដ្ឋាន​កង​រាជអាវុធហត្ថក្រុង​សិរីសោភ័ណ​បានឱ្យដឹងថា ក្រោយទទួលបានពាក្យបណ្ដឹង និងមានភស្ដុតាង រូបភាពវីដេអូកាមេរ៉ាសុវត្ថិភាពផង កម្លាំងមូលដ្ឋានកងរាជអាវុធហត្ថក្រុង​បាន​ធ្វើ​ពាក្យ​ស្នើ​សុំ​បើក​ការ​ស៊ើបអង្កេត​មក​ការិយាល័យ​ព្រហ្មទណ្ឌ​កងរាជអាវុធហត្ថខេត្ត ដើម្បី​រៀប​ចំ​នីតិវិធី​បន្ត​ទៅ​អយ្យការ អមសាលាដំបូង​ខេត្តបន្ទាយមានជ័យ។ បន្ទប់ពីទទួលបានដីកាសម្រេចឱ្យបើកការស៊ើបអង្កេតបឋម លេខ ០៨.អ.យ.ក ចុះថ្ងៃទី៩ ខែមករា ឆ្នាំ២០២៥ របស់ លោក កើត វណ្ណារ៉េត ព្រះរាជអាជ្ញា នៃអយ្យកាអមសាលាដំបូងខេត្ត កម្លាំងជំនាញកងរាជអាវុធហត្ថក្រុងបានធ្វើការកោះហៅឈ្មោះ ឡម ចិន្ដា ភេទស្រី អាយុ២៦ឆ្នាំ ស្នាក់នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ​ចូល​មក​ឆ្លើយ​បំភ្លឺ​លើ​ករណី​ខាង​លើ នៅ​មូលដ្ឋាន​កងរាជអាវុធហត្ថក្រុង​សិរីសោភ័ណ នាថ្ងៃទី១៤ ខែមករា ឆ្នាំ២០២៥ តែឈ្មោះ ឡម ចិន្ដា បាន​ឆ្លើយ​បដិសេធ​នូវ​ទង្វើ​របស់ខ្លួនដែលបានប្រព្រឹត្តដូចមានក្នុងវីដេអូកាមេរ៉ាសុវត្ថិភាព​របស់​ដើម​បណ្ដឹង​ឈ្មោះ នឿន វន្នី។

លោក​វរសេនីយ៍ត្រី សុខ ឡេង បាន​ឱ្យ​ដឹង​ទៀត​ថា ទោះ​បី​ឈ្មោះ ឡម ចិន្ដា មិន​ទទួល​ស្គាល់​លើ​ភស្ដុតាង​រូបថត​កាមេរ៉ាសុវត្ថិភាព​ក៏​ដោយ កម្លាំង​ជំនាញ​របស់ខ្លួនបានកសាងសំណុំរឿង តាមនីតិវិធី​បញ្ជូន​មក​កាន់ការិយាល័យព្រហ្មទណ្ឌ​កងរាជអាវុធហត្ថខេត្ត​ចាត់​ការ​បន្តតាមដីកាសម្រេច​ឱ្យបើកការស៊ើបអង្កេត​របស់​អយ្យកា​អម​សាលាដំបូងខេត្តបន្ត។

លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មេីសបានឱ្យដឹងថា ការឃាត់ខ្លួនករណីខាងលើនេះ ដោយទទួលបានការអនុញ្ញាតពី លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត  ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្តហើយ នៅព្រឹកថ្ងៃ ទី១៥ ខែមករា ឆ្នាំ២០២៥ ដើម្បីអនុវត្តតាមនីតិវិធីច្បាប់៕

ដោយ ៖ វ៉ាន់ ណាង