រយៈពេល៦ខែ នគរបាលរាជធានីបង្ក្រាបបទល្មើសបាន ៨៨ករណី ឃាត់ខ្លួនជនសង្ស័យសរុប ៣៨៣​នាក់

លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងរយៈពេល ៦ខែចុងក្រោយនេះ កម្លាំងសមត្ថកិច្ចជំនាញបានសហការជាមួយកម្លាំងនគរបាលនៅតាមបណ្ដាអធិការដ្ឋាននគរបាលខណ្ឌទាំង១៤ បង្ក្រាបបទល្មើសបានចំនួន៨៨ករណី ឃាត់ខ្លួនជនសង្ស័យសរុបចំនួន ៣៨៣នាក់។ ក្នុងនោះ បទល្មើសឧក្រិដ្ឋចំនួន ៣ករណី ឃាត់ខ្លួនជនសង្ស័យចំនួន២០នាក់ និងបទល្មើសមជ្ឈឹមបង្ក្រាបបានចំនួន៨៥ករណី ឃាត់ខ្លួនជនសង្ស័យចំនួន ៣៦៣នាក់។

ការបញ្ជាក់របស់អ្នកនាំពាក្យរូបនេះ បានធ្វើឡើងនៅក្នុងសន្និសីទសារព័ត៌មានបង្ហាញមុខក្រុមជនសង្ស័យចំនួន២៩នាក់ កាលពីព្រឹកថ្ងៃទី១៦ ខែមករានេះ នៅស្នងការដ្ឋាននគរបាលរាជធានីភ្នំពេញ។

លោក សំ វិច្ឆិកា បានបន្តថា ការសហការទប់ស្កាត់ និងបង្ក្រាបបទល្មើស ជាពិសេសក្រុមក្មេងទំនើងនេះ គឺធ្វើឡើងជាបន្តបន្ទាប់ដោយអនុវត្តតាមបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំពាក់ព័ន្ធ ហើយនៅដើមខែមករា ឆ្នាំ២០២៥នេះ នគរបាលរាជធានីភ្នំពេញ ក៏បានធ្វើសន្និសីទសារព័ត៌មានចំនួន២លើករួចមកហើយដែរ ពាក់ព័ន្ធបទល្មើស និងជនសង្ស័យមួយចំនួន និងបានបញ្ជូនបន្តដើម្បីអនុវត្តនីតិវិធីច្បាប់។

ក្នុងនាមសមត្ថកិច្ច លោក សំ វិច្ឆិកា បានអំពាវនាវដល់ឪពូកម្ដាយ អាណាព្យាបាល គណៈគ្រប់គ្រងសាលារៀន ជួយសហការផ្តល់ព័ត៌មានជាមួយកម្លាំងអាជ្ញាធរមូលដ្ឋាន អំពីសកម្មភាពក្មេងទំនើង ក៏ដូចជាសិស្សានុសិស្សលួចលាក់ ដាក់ដាវកាំបិតតាមខ្លួនជាដើម។

ជាមួយគ្នានោះ កងកម្លាំងអាជ្ញាធរមានសមត្ថកិច្ចទាំងអស់ ត្រូវបន្តយកចិត្តទុក និងពង្រឹងបន្ថែមឲ្យកាន់តែខ្លាំងជាងមុន លើការបង្ក្រាបសកម្មភាពក្រុមក្មេងទំនើងឱ្យមានប្រសិទ្ធិភាពខ្ពស់បំផុត ចាំបាច់ត្រូវតែបង្ក្រាបឱ្យអស់ឬសគល់ ដោយមិនត្រូវបណ្តែតបណ្តោយឱ្យក្រុមទំនើងមួយក្តាប់តូច ធ្វើសកម្មភាពបង្កភាពប៉ះពាល់ដល់ប្រជាពលរដ្ឋ និងសង្គមជាតិទាំងមូលនោះឡើយ៕

អត្ថបទ៖ សំណាង