អាជ្ញាធរសង្កាត់ក្រាំងធ្នង់ គ្រោងបើកឲ្យដំណើរផ្លូវបេតុងមួយខ្សែទៀត ខណៈការអភិវឌ្ឍន៍ក្នុងសង្កាត់​ទាំងមូលសម្រេចបានប្រមាណ៦០ភារយ

នៅព្រឹកថ្ងៃទី១៧ ខែមករា ឆ្នាំ២០២៥ គណៈកម្មាធិការលទ្ធកម្មខណ្ឌសែនសុខ​ រួមជាមួយលោកចៅសង្កាត់ក្រាំងធ្នង់ លោកមេភូមិ បានចុះពិនិត្យការដ្ឋានស្ថាបនាផ្លូវបេតុង១ខ្សែដែលមានប្រវែង​ ៣០៧ម៉ែត្រ ស្ថិតក្នុងភូមិត្រពាំងជេីងស្រុក សង្កាត់ក្រាំងធ្នង់ ខណ្ឌសែនសុខ។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ បរិស្ថាន និងអនាម័យខណ្ឌសែនសុខ បានឲ្យដឹងថា ផ្លូវបេតុងដែលកំពុងស្ថាបនានេះ មានប្រវែង​ ៣០៧ម៉ែត្រ ទទឹង៦ម៉ែត្រ កម្រាស់០,១៥ម៉ែត្រ ដែលជាគម្រោងមូលនិធិអភិវឌ្ឍខណ្ឌឆ្នាំ២០២៤​ ដើម្បីជួយសម្រួលចរាចរណ៍ជូនប្រជាពលរដ្ឋ។

ក្រុមការងារគណៈកម្មាធិការលទ្ធកម្មខណ្ឌសែនសុខ​ បានណែនាំដល់ក្រុមហ៊ុនសាងសង់ផ្លូវបេតុង ត្រូវយកចិត្តទុកដាក់សាងសង់ឱ្យទាន់តាមការកំណត់ ពិសេសត្រូវសាងសង់តាមលក្ខណៈបច្ចេកទេស ដោយគិតលើគុណភាព សុវត្ថិភាព និងសោភ័ណភាព។

លោក សឿន សួរ ចៅសង្កាត់ក្រាំងធ្នង់ បានប្រាប់ កម្ពុជាថ្មី នារសៀលថ្ងៃទី១៧ ខែមករា នេះថា ផ្លូវមួយខ្សែនេះ​តភ្ជាប់ពីភូមិត្រពាំងជើងស្រុក ទៅភូមិត្រពាំងមាន ដែលបច្ចុប្បន្នសម្រេចបាន៦០ភាគរយ ហើយគ្រោងនឹងបញ្ចប់នៅសប្តាហ៍ក្រោយនេះ។ បន្ទាប់ពីបញ្ចប់គម្រោងនេះ អាជ្ញាធរនឹងផ្អាកចរាចរណ៍រយៈពេល២៨ថ្ងៃដើម្បីឱ្យគុណភាពសំណង់រឹងមាំល្អ ហើយអាចនឹងដាក់ឱ្យប្រើប្រាស់បាននៅចុងខែកុម្ភៈខាងមុខនេះ។

លោកចៅសង្កាត់បន្ថែមថា បច្ចុប្បន្នក្នុងមូលដ្ឋានសង្កាត់ក្រាំងធ្នង់ទាំងមូល មានផ្លូវបេតុងសម្រេចបានប្រមាណ​៦០​ភាគរយ នៅ៤០ភាគរយប៉ុណ្តោះជាផ្លូវលំដី ក្នុងនោះប្រព័ន្ធលូមួយចំនួននៅមិនទាន់មានគ្រប់ផ្លូវនៅឡើយទេ ប៉ុន្តែគម្រោងដាក់លូនេះក៏មានក្នុងគម្រោង៣ឆ្នាំរំកិលរបស់រដ្ឋបាលសង្កាត់ក្រាំងធ្នង់ផងដែរ៕

អត្ថបទ៖ សំណាង