ផ្លូវមួយកន្លែងក្នុងមូលដ្ឋានសង្កាត់ផ្សារដើមគ ក្លាយជាកន្លែងគំនរសំរាម ខណៈអាជ្ញាធរថា នឹងដាក់កម្លាំងឃ្លាំមើលអ្នកលួចចោល

សំរាមនៅតែជាបញ្ហា ទោះបីជាមានការណែនាំពីសំណាក់អាជ្ញាធរ និងមានធុងសំរាមត្រឹមត្រូវយ៉ាងណាក៏នៅមានពលរដ្ឋមួយចំនួនតូច មិនគោរពទៅតាមការណែនាំរបស់អាជ្ញាធរ។

នៅចំណុចផ្លូវលេខ ២២៣ កែងផ្លូវលេខ ២៣០ ស្ថិតនៅក្នុងមូលដ្ឋានសង្កាត់ផ្សារដើមគ ខណ្ឌទួលគោក រាជធានីភ្នំពេញ សំរាមបានជះក្លិនអាក្រក់ទៅកាន់អ្នករស់នៅជុំវិញនោះ បង្កអោយសោភណ្ឌភាពដងផ្លូវត្រូវបានបាត់បង់។

អ្នកស្រី ណុច ជាពលរដ្ឋរស់នៅក្បែរនោះបានលើកឡើងថា ភាគច្រើនពលរដ្ឋដែលរស់នៅជុំវិញនោះ រួមទាំងគាត់មិនដែលយកសំរាមទៅចោលលើផ្លូវបែបនេះឡើយ គាត់តែងធ្វើទៅតាមការណែនាំរបស់អាជ្ញាធរ ទាល់តែមានរថយន្តប្រមូលសំរាមមកដល់ ទើបគាត់ក៏ដូចជាអ្នកនៅក្បែរនោះយកចេញមកក្រៅដើម្បីកាត់បន្ថយសំរាមលើដងផ្លូវ។

លោក ហេង ជាអ្នកលក់ដូរក្បែរនោះក៏បានអោយដឹងដែរថា ការចោលសំរាមនេះ បានបង្កសាយភាយក្លិនស្អុយជូរ និងទឹកដក់លើផ្លូវ ហើយមួយចំនួនតូចមិនមែនជាអ្នករស់នៅតំបន់សង្កាត់ផ្សារដើមគឡើយ ភាគច្រើនជាអ្នកលក់ដូរតាមរទេះ ចល័ត និងមានអាជីវករលក់បន្លែមួយចំនួនតែងយកមកចោលទីនេះ ដែលធ្វើឲ្យប៉ះពាល់ដល់បរិស្ថាន និងសោភណ្ឌភាពទីក្រុងយ៉ាងខ្លាំង។

ទាក់ទិនបញ្ហាសំរាមនេះដែរ លោក ទិត្យ សាមឿន ចៅសង្កាត់ផ្សារដើមគរ បានប្រាប់អោយដឹងថា ដោយសារប៉ុន្មានថ្ងៃនេះ ក្រុមហ៊ុនប្រមូលសំរាមមានបញ្ហាបន្តិចបន្តួច ទើបមិនបានមកយកធ្វើអោយគំនរសំរាមកើនឡើង ហើយពីមុនមកចំណុចនេះមានធុងច្រើនដែរ ប៉ុន្តែពេលធុងទាំងអស់នោះត្រូវថ្ងៃក្តៅផង មានភ្លៀងផងធ្វើអោយធុងចាប់ផ្តើមខូចម្តងមួយៗ រហូតមកដល់សព្វថ្ងៃនេះ។ លោកចៅសង្កាត់បន្តថា ចំពោះអាជីវករដែលយកបន្លែសល់ មកបោះចោលពាសវាល ពាសកាល លោកនឹងចាត់អោយមន្រ្តីសង្កាត់ឃ្លាំមើល ដើម្បីចាប់ផាកពិន័យតាមច្បាប់អន្តរកាលដែលបានកំណត់៕

អត្ថបទ៖ រដ្ឋា