ពីរថ្ងៃនៃពិធីបុណ្យចូលឆ្នាំចិន វៀតណាម អគ្គិភ័យបានកើតឡើង១១លើកនៅទូទាំងប្រទេស និងស្លាប់មនុស្សម្នាក់

ឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានឲ្យដឹងនៅល្ងាចថ្ងៃទី២៩ ខែមករា ឆ្នាំ២០២៥ ថា ពីរថ្ងៃក្នុងឱកាសពិធីបុណ្យចូលឆ្នាំចិន វៀតណាម គឺថ្ងៃទី២៨ និងទី២៩មករា នៅទូទាំងប្រទេសមានករណីអគ្គិភ័យបានកើតឡើងចំនួន១១លើក និងបណ្ដាលឲ្យបាត់បង់ជីវិតមនុស្សម្នាក់។ លោកបញ្ជាក់ថា ករណីអគ្គិភ័យដែលកើតឡើងនេះ គឺកើតឡើងដោយកក្តា៣ គឺឆ្លងចរន្ដអគ្គិសនី ដុតទៀនធូប និងដុតខ្លួនឯង។

ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បញ្ជាក់ថា នៅថ្ងៃទី២៨មករា ដែលជាថ្ងៃសែនចូលឆ្នាំចិន វៀតណាម គិតចាប់ពីម៉ោង៦ព្រឹក ដល់ម៉ោង៦ល្ងាចនៅទូទាំងប្រទេសមានករណីអគ្គិភ័យកើតឡើងចំនួន២លើក គឺនៅខេត្តកំពង់ចាម ១លើក និងនៅខេត្តកោះកុង ១លើក បណ្ដាលឲ្យខូចខាតផ្ទះ១ខ្នង និងព្រៃមួយកន្លែង។

សម្រាប់ថ្ងៃទី២៩មករា ដែលជាថ្ងៃបុណ្យចូលឆ្នាំចិន វៀតណាម ទី២ គិតចាប់ពីម៉ោង៦ព្រឹក ដល់ម៉ោង៦ល្ងាចដូចគ្នា នៅទូទាំងប្រទេស ករណីអគ្គិភ័យបានកើតឡើងចំនួន៩លើក នៅក្នុងរាជធានី ខេត្ត ចំនួន៧ រួមមាន រាជធានីភ្នំពេញ ខេត្តកណ្តាល កំពង់ឆ្នាំង បាត់ដំបង ព្រះសីហនុ កោះកុង និងខេត្តកែប។ ក្នុងករណីអគ្គិភ័យទាំង៩លើកនេះ បានបណ្ដាលឲ្យខូចខាតផ្ទះចំនួនន៤ខ្នង បន្ទប់ចំនួន ៣ ឆេះព្រៃ និងជញ្រ្ជាំងអស់ ១០ហិកតា និងបណ្ដាលឲ្យបាត់បង់ជីវិតមនុស្សម្នាក់ជាស្ត្រី។

បើតាមឧត្តមសេនីយ៍ឯក នេត វន្ថា នៅក្នុងឱកាសពិធីបុណ្យចូលឆ្នាំចិន វៀតណាម នេះ កម្លាំងជំនាញបង្ការ និងពន្លត់អគ្គិភ័យនៅតាមបណ្ដារាជធានីខេត្តទូទាំងប្រទេស បានត្រៀមកម្លាំងប្រចាំការ២៤ម៉ោងលើ២៤ម៉ោង ដើម្បីត្រៀមបង្ការទប់ស្កាត់ករណីអគ្គិភ័យដែលកើតមានឡើងជាយថាហេតុ៕