អាជ្ញាធរសង្កាត់ផ្សារកណ្តាលទី១ ជូនដំណឹងដល់អាជីវករលក់ដូរលើចិញ្ចើមផ្លូវព្រះស៊ីសុវត្តិ ពីការរៀបចំ ផ្លូវថ្មើរជើង

លោក អ៊ុច សារុំ ចៅសង្កាត់ផ្សារកណ្តាលទី១ និងជាប្រធានគណបញ្ជាការឯកភាពសង្កាត់បាន ដឹកនាំកម្លាំងគណបញ្ជាការឯកភាពសង្កាត់សហការជាមួយកម្លាំងគណបញ្ជាការឯកភាពខណ្ឌដូនពេញ និងកម្លាំងប៉ុស្តិ៍នគបាលរដ្ឋបាលផ្សារកណ្តាលទី១ ចុះផ្សព្វផ្សាយជូនដំណឹងដល់អាជីវករ និងអ្នកលក់ដូរលើចិញ្ចើមផ្លូវ ព្រះស៊ីសុវត្តិ ផ្លូវ១១០;​១១៨;​១៣០;១៣៦;១៥៤ ដើម្បីរៀបចំផ្លូវ ថ្មើរជើង ងាយស្រួលដល់ប្រជាពលរដ្ឋ និងភ្ញៀវទេសចរធ្វើដំណើរកំសាន្តពេលរាត្រី។

លោកចៅសង្កាត់ផ្សារកណ្តាលទី១ បានក៏បានសំណូមពរដល់ប្រជាពលរដ្ឋចូលរួមសហការដើម្បីអាជ្ញាធរងាយស្រួលក្នុងការរៀបចំដំណើរកម្សាន្ត សម្រាប់ភ្ញៀវទេសចរជាតិ និងអន្តរជាតិ ចាប់ពីម៉ោង១៨និង០០រហូតដល់ម៉ោង២៣និង០០រៀងរាល់ថ្ងៃសៅរ៍ និងថ្ងៃអាទិត្យ។

លោកស្រី អុី ណេង ជាអាជីវករបានអោយដឹងថា បន្ទាប់ពីមានអាជ្ញាធរចុះផ្សព្វផ្សាយណែនាំរួចមក ពួកគាត់បានយល់ព្រមចូលរួមសហការ ដើម្បីអោយអាជ្ញាធរងាយស្រួលក្នុងការរៀបចំ ផ្លូវថ្មើរជើងអោយភ្ញៀវជាតិ និងអន្តរជាតិ ស្រួលធ្វើដំណើរ និងជួយលើកកម្ពស់សោភណ្ឌភាពដងផ្លូវផងដែរ។

គួររំលឹកផងដែរថា កាលពីថ្ងៃទី២៩ ខែមករា ឆ្នាំ២០២៥ លោក ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំស្តីពីការបើកដំណើការសាកល្បងផ្លូវថ្មើរជើងថ្មីខាងលើ បានមានប្រសាសន៍ថា ផ្លូវថ្មើជើងនេះ រដ្ឋបាលរាជធានីភ្នំពេញមានគម្រោងយូរមកហើយ ពោលគឺតាំងពីឆ្នាំ២០១៩មកម្លេះ ប៉ុន្តែដោយសារស្ថានភាពនៃវិបត្តិជំងឺកូវីដ-១៩ បានធ្វើឱ្យគម្រោងនេះផ្អាកដំណើរការសិន។ បន្ទាប់ពីមានការណែនាំរបស់រាជរដ្ឋាភិបាល រដ្ឋបាលរាជធានីភ្នំពេញបានជំរុញការងារឱ្យផ្លូវថ្មើរជើងនេះ ដំណើរការឡើងវិញ ដើម្បីធ្វើយ៉ាងណាទាក់ទាញភ្ញៀវទេសចរជាតិ និងអន្តរជាតិ មកលេងកម្សាន្តឱ្យបានកាន់តែច្រើន ៕

អត្ថបទ៖ ម៉េង