បាត់ចេញពីផ្ទះ២ថ្ងៃ ប្រទះឃេីញដុតខ្លួនឯងរងរបួសធ្ងន់

បុរសម្នាក់ដោយសារមានជំងឺផ្លូវចិត្ត និងធ្លាប់ប្រេីប្រាស់គ្រឿងញៀនបានដើរចេញពីផ្ទះអស់រយៈពេល២ថ្ងៃ ហើយត្រូវបានគេប្រទះឃេីញមកដុតខ្លួនឯងនៅពហុកីឡដ្ឋានជាតិអូឡាំពិកតែត្រូវបានសមត្ថកិច្ចជួយសង្គ្រោះទាន់ពេលវេលា។

ហេតុការណ៍នេះបានកេីតឡេីងកាលពីវេលាម៉ោង០៧និង២០នាទីព្រឹក ថ្ងៃទី២ ខែកុម្ភៈ ឆ្នាំ២០២៥ នៅពហុកីឡដ្ឋានជាតិអូឡាំពិក (ដំបូលបី) សង្កាត់ វាលវង់ ខណ្ឌ៧មករា។

ជនរងគ្រោះមានឈ្មោះ កែវ សុខពៅ ភេទប្រុស អាយុ៤០ឆ្នាំ ស្នាក់នៅផ្លូវលេខ១៦១ ភូមិ០៣ សង្កាត់វាលវង់ ខណ្ឌ៧មករា។

តាមប្រភពព័ត៌មានបានឲ្យដឹងថា​ មុនពេលកេីតហេតុមានប្រជាពលរដ្ឋដើរហាត់ប្រាណនៅទីតាំងខាងលេី​ ក៏ប្រទះឃើញជនរងគ្រោះធ្វើសកម្មភាពដុតខ្លួនឯង ខណៈនោះប្រជាពលរដ្ឋក៏បាននាំគ្នាជួយសង្រ្គោះ និងបានទំនាក់ទំនងទៅសមត្ថកិច្ចហៅរថយន្តពេទ្យដើម្បីសង្រ្គោះ។

បើយោងតាមការបំភ្លឺពីឈ្មោះ កែវ ស្រីតូច ភេទស្រី អាយុ៤៦ឆ្នាំ ត្រូវជាបងស្រីជនរងគ្រោះបានបញ្ជាក់ប្រាប់សមត្ថកិច្ចថាប្អូនប្រុសរបស់គាត់ មានជំងឺផ្លូវចិត្ត និងធ្លាប់ប្រើប្រាស់គ្រឿងញៀន ហើយបានចេញបាត់ពីផ្ទះ២ថ្ងៃកន្លងមកហើយ ។

បច្ចុប្បន្នជនរងគ្រោះកំពុងសង្គ្រោះបន្ទាន់នៅមន្ទីរពេទ្យកាល់ម៉ែត្រ ហើយបើតាមការបញ្ជាក់ពីគ្រូពេទ្យឲ្យដឹងថា បុរសខាងលើក៏ធ្លាប់ធ្វើសកម្មភាពដុតខ្លួនឯង ម្តងរួចមកហើយ នៅម្តុំវិមានឯករាជ្យ៕

អត្ថបទ៖ សុខា