អាវុធហត្ថខេត្តតាកែវ បញ្ជូនជនសង្ស័យ​៦នាក់ទៅតុលាការ ពាក់ព័ន្ធករណីលួចនៅឧទ្យានសួនសត្វភ្នំតាម៉ៅ

ថ្ងៃទី៣ ខែកុម្ភៈ ឆ្នាំ២០២៥ ​កម្លាំងជំនាញកងរាជ អាវុធហត្ថខេត្តតាកែវ​ ដោយមានការសម្របសម្រួលនីតិវិធីពីលោក ទៀវ ពណ្ណរាយ ព្រះរាជអាជ្ញារងអមសាលាដំបូងខេត្តតាកែវ​ បានកសាងសំណុំរឿងបញ្ជូនខ្លួនជនសង្ស័យចំនួន៦នាក់ទៅតុលាការ ក្រោយបង្ក្រាបបានពាក់ព័ន្ធករណីលួចនៅឧទ្យានសួនសត្វភ្នំតាម៉ៅ។

តាមការបញ្ជាក់ពីសមត្ថកិច្ចថា​ កាលពីវេលាម៉ោង៩និង៤៩នាទី ថ្ងៃទី៣០ ខែមករា ឆ្នាំ២០២៥ កម្លាំងមូលដ្ឋានកងរាជអាវុធហត្ថស្រុកបាទី ដឹកនាំដោយលោកវរសេនីយ៍ត្រី ម៉េង មារ៉ាដា មេបញ្ជាការមូលដ្ឋានកងរាជអាវុធហត្ថស្រុក បានចុះបង្រ្កាបអំពើលួចជាក់ស្តែង ដែលប្រព្រឹត្តត្រង់ចំណុចឧទ្យានសួនសត្វភ្នំតាម៉ៅ ស្ថិតនៅភូមិខ្សាច់លប់ ឃុំត្រពាំងសាប ស្រុកបាទី​ ខេត្តតាកែវ។

សមត្ថកិច្ចបន្តថា​ ជាលទ្ធផល​បានឃាត់ខ្លួនជនសង្ស័យសរុប៦នាក់ ស្រី៣នាក់​ ដកហូតវត្ថុតាងចាប់យករួមមាន ទូរស័ព្ទដៃចំនួន​៧គ្រឿង​ ម៉ូតូកង់បីឥណ្ឌា០១គ្រឿង ពាក់ផ្លាកលេខភ្នំពេញ1GH.2841 ពណ៌លឿង​ កូនកាបូបដៃ០៣,កូនកាបូបស្ពាយ០៣​ និងប្រាក់រៀល ២,៤៥៥,៥០០រៀល។

បច្ចុប្បន្នជនសង្ស័យ និងវត្ថុតាងត្រូវបានការិយាល័យជំនាញកងរាជអាវុធហត្ថខេត្តតាកែវកសាងសំណុំរឿងទៅអយ្យការអមសាលាដំបូងខេត្តតាកែវ ចាត់ការតាមនីតិវិធី៕

​អត្ថបទ៖ វីរៈ