អភិបាលខេត្តរតនគិរី ជំរុញកម្លាំងជំនាញបន្តអនុវត្តឱ្យបានម៉ឺងម៉ាត់រាល់បញ្ហាអសន្តិសុខក្នុងសង្គម

លោក ញ៉ែម សំអឿន អភិបាលខេត្តរតនគិរី បានជំរុញដល់កម្លាំងសមត្ថកិច្ចទាំងអស់ បន្តអនុវត្តឱ្យបានម៉ឺងម៉ាត់រាល់បញ្ហាអសន្តិសុខសង្គម ដូចជាក្មេងទំនើង បញ្ហាគ្រឿងញៀន និងរៀបចំសណ្តាប់ធ្នាប់សាធារណៈឱ្យកាន់តែល្អបន្ថែមទៀត។ ការលើកឡើងនេះ ធ្វើនៅថ្ងៃទី៤ ខែកុម្ភៈ ឆ្នាំ២០២៥ ក្នុងឱកាសក្រុមប្រឹក្សាខេត្តរតនគិរី បើកកិច្ចប្រជុំសាមញ្ញលើកទី៩របស់ខ្លួន។

ក្នុងឱកាសនេះ លោក ញ៉ែម សំអឿន ជំរុញដល់កម្លាំងជំនាញទាំងអស់ ត្រូវទប់ស្កាត់អោយបានម៉ឺងម៉ាត់នៅរាល់បញ្ហាអស្ថេរភាពសង្គម ពិសេសការចែកចាយ និងការជួនដូរគ្រឿងញៀន ឱ្យបានល្អប្រសើរនៅក្នុងមូលដ្ឋាន។ ជំរុញការបង្ការទប់ស្កាត់ឱ្យបានជាអតិបរិមា នូវបញ្ហាគ្រោះថ្នាក់ចរាចរណ៍ ដោយអនុវត្តជាក់ស្តែង និងផ្សព្វផ្សាយច្បាប់ស្តីពីចរាចរណ៍ផ្លូវគោក អោយដល់សិស្សានុសិស្ស និងប្រជាពលរដ្ឋផងដែរ។

ជាមួយគ្នានេះ លោក ញ៉ែម សំអឿន បានជំរុញឱ្យ អាជ្ញាធរក្រុង ស្រុក មន្ទីរអង្គភាពទាំងអស់ត្រូវយកចិត្តទុកដាក់ លើបញ្ហាអនាម័យបរិស្ថាន សណ្តាប់ធ្នាប់សាធារណៈ ពិសេសតាមផ្លូវសំខាន់ៗ និងក្នុងមូលដ្ឋានដែលប្រជាពលរដ្ឋរស់នៅ។ លោកក៏សូម ឱ្យយកចិត្តទុកដាក់លើការបង្ក្រាបក្មេងទំនើងឱ្យ ខានតែបានដែលបង្ករអសន្តិសុខដល់សង្គម និងនៅមូលដ្ឋាន។ អភិបាលខេត្ត ក៏ស្នើឱ្យមន្ទីរអង្គភាពទាំអស់ ត្រូវរក្សាសាមគ្គីភាព ឯកភាពផ្ទៃក្នុង ឱ្យបានល្អប្រសើរថែមទៀតផង។

សូមជម្រាបថា កិច្ចប្រជុំខាងលើ ធ្វើឡើងដើម្បីពិនិត្យពិភាក្សា និងអនុម័ត សេចក្តីព្រាងកំណត់ហេតុកិច្ចប្រជុំសាមញ្ញលើកទី៨របស់ ក្រុមប្រឹក្សាខេត្ត។ ពិនិត្យពិភាក្សា និងអនុម័ត សេចក្តីព្រាងរបាយការណ៍ប្រចាំខែមករា និងលើកទិសដៅ ការងារប្រចាំខែកុម្ភៈ ឆ្នាំ២០២៥ របស់រដ្ឋបាលខេត្ត។ ពិនិត្យពិភាក្សា និងអនុម័ត ស្តីពីការបិទបញ្ជីចំណូល-ចំណាយថវិកា និងរបាយការណ៍ បូកសរុបសម្រេចទូទាត់ថវិកា របស់រដ្ឋបាលខេត្តរតនគិរីប្រចាំ ឆ្នាំ២០២៤ផងដែរ៕

អត្ថបទ៖ ខៀវ ចាប