ភ្លើងឆេះព្រៃលើភ្នំសំពៅ បង្ខំឲ្យព្រះសង្ឃជម្លៀសព្រះកាយចេញរកកន្លែងសុវត្ថិភាព

មានការភ្ញាក់ហើយយ៉ាងខ្លាំង នៅពេលដែលមានអណ្ដាតភ្លើងឆាបឆេះយ៉ាងសន្ធោសន្ធៅនៅលើភ្នំសំពៅ ក្បែរវត្តគិរីធម្មវ័ន បង្ខំឲ្យព្រះសង្ឃដែលគង់នៅទីនោះ ជម្លៀសព្រះកាយចុះមកក្រោមជើងភ្នំ ដើម្បីសុវត្ថិភាព។

ហេតុការណ៍នេះបានកើតឡើងកាលពីព្រលប់ថ្ងៃទី៦ ខែកុម្ភៈ ឆ្នាំ២០២៥ ស្ថិតនៅលើចង្កេះភ្នំសំពៅ ក្នុងភូមិភ្នំសំពៅលិច ឃុំភ្នំសំពៅ ស្រុកបាណន់ ខេត្តបាត់ដំបង ដែលបានបង្ខំឲ្យព្រះសង្ឃដែលគង់នៅទីអារាមនោះគេចព្រះកាយចុះមកជើងភ្នំសំពៅ ដើម្បីសុវត្ថិភាព ព្រោះការឆាបឆេះនេះនៅមិនឆ្ងាយពីទីអារាមនោះឡើយ។

ក្នុងករណីភ្លើងឆេះព្រៃនេះ ទាំងប្រជាការពារ ទាំងកម្លាំងប៉ុស្តិ៍ភ្នំសំពៅ និងទាំងកម្លាំងអធិការដ្ឋាននគរបាលស្រុកបាណន់ បានចុះមកអន្តរាគមន៍ប៉ុន្តែមិនអាចប្រើប្រាស់រថយន្តពន្លត់អគ្គិភ័យបានឡើយ ដោយសារតែទីតាំងដែលឆេះនោះនៅលើចង្កេះភ្នំសំពៅ ដូច្នេះហើយទើបកម្លាំងទាំងអស់បានសម្រុកឡើងទៅលើភ្នំដើម្បីធ្វើការវាយពន្លត់ និងប្រើប្រាស់ឧបករណ៍បំពង់ពន្លត់អគ្គិភ័យ ដើម្បីធ្វើការអន្តរាគមន៍រហូតបានរលត់ទាំងស្រុង។

ជុំវិញបញ្ហានេះ សមត្ថកិច្ចនៅមិនទាន់សន្និដ្ឋានបាននោះឡើយ អំពីមូលហេតុនៃការឆាបឆេះទាំងនេះ ព្រោះដោយសារតែនៅលើភ្នំសំពៅនាពេលបច្ចុប្បន្ន ក៏មានហ្វូងសត្វស្វាជាច្រើនក្បាលកំពុងរស់នៅក្នុងព្រៃលើភ្នំសំពៅនេះដែរ ដូច្នេះរាល់បញ្ហានេះសមត្ថកិច្ចនឹងធ្វើការស្រាវជ្រាវតាមក្រោយ៕

អត្ថបទ៖ សោ និយមរ័ត្ន