ឃាត់ខ្លួនមុខសញ្ញាឆក់៣នាក់ ក្រោយធ្វើសកម្មភាពឆក់បានសម្រេចនៅខណ្ឌចំការមន

កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ សហការជាមួយនគរបាលមូលដ្ឋាន ស្រាវជ្រាវបង្ក្រាបជនសង្ស័យចំនួន៣នាក់ ដែលជាមុខសញ្ញាឆក់ទូរស័ព្ទ ក្រោយក្រុមនេះធ្វើសកម្មភាពឆក់ទូរស័ព្ទ ម៉ាក អាយហ្វូន ១៥ផ្លឹស បានសម្រេចពីនារីម្នាក់ កាលពីថ្ងៃទី៩ ខែកុម្ភៈ នៅចំណុចផ្លូវ១២៣ សង្កាត់ទួលទំពូងទី១ ខណ្ឌចំការមន វេលាម៉ោងប្រហែល១និង៤០នាទីរសៀល។

នគរបាលបានឱ្យដឹងថា ការឃាត់ខ្លួនក្រុមជនសង្ស័យទាំងនេះធ្វើឡើងបន្ទាប់ពីពួកគេធ្វើសកម្មភាពឆក់យកទូរស័ព្ទ ម៉ាកអាយហ្វូន១៥ផ្លឹស ពីនារីជនរងគ្រោះម្នាក់ដែលកំពុងឈប់ម៉ូតូឆាតជាមួយមិត្តភក្តិ ធ្វើសកម្មភាពដោយម៉ូតូពីរគ្រឿងមានគ្នា៤នាក់ រួចជិះគេចខ្លួនបាត់។

ក្រោយពីទទួលបានពាក្យបណ្ដឹងពីនារីរងគ្រោះ នគរបាលមូលដ្ឋានបានសហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល បើការស្រាវជ្រាវរហូតកំណត់មុខសញ្ញាបាន និងទីតាំងដែលជនសង្ស័យលាក់ខ្លួន។

នគរបាលជំនាញបានបន្តថា លុះដល់ថ្ងៃទី៩ ខែកុម្ភៈ ឆ្នាំ២០២៥ នគរបាលបានចុះឃាត់ជនសង្ស័យបានចំនួន៣នាក់នៅចំណុចផ្ទះសំណាក់ស្លឹកលាភមាស ផ្លូវ៣៧១ សង្កាត់ដង្កោ ខណ្ឌដង្កោ ដកហូតទូរស័ព្ទរបស់ជនរងគ្រោះបានមកវិញ រួមនិងម៉ូតូជនរងគ្រោះចំនួន២គ្រឿង។

បច្ចុប្បន្នជនសង្ស័យទាំង៣នាក់រួមទាំងវត្ថុតាងត្រូវបានបញ្ជូនឃុំខ្លួនជាបណ្ដោះអាសន្ននៅជំនាញការិយាល័យព្រហ្មទណ្ឌកម្រិតស្នាលនៃស្នងការនគរបាលរាជធានីភ្នំពេញ ដើម្បីបញ្ជូនទៅតុលាការចាត់ការតាមនីតិវិធីច្បាប់៕

អត្ថបទ៖ សំណាង