ពលរដ្ឋនៅភូមិទួលពង្រ ស្នេីឲ្យអាជ្ញាធររំដោះទឹកស្អុយចេញពីផ្លូវ ទោះមិនស្ថាបនាជួសជុលផ្លូវក៏ដោយ

ប្រជាពលរដ្ឋរស់នៅភូមិ​ទួលពង្រ​ សង្កាត់ចោមចៅទី១​ ខណ្ឌពោធិ៍សែនជ័យ​ ស្នើឲ្យអាជ្ញាធរជួយពិនិត្យ និងដោះស្រាយបញ្ហាទឹកស្អុយដែលហៀរចេញពីប្រព័ន្ធលូដក់លេីដងផ្លូវបេតុ ជះក្លិនស្អុយប៉ះពាល់ក្នុងការរស់នៅ និងប្រកបរបរផ្សេងៗរៀងរាល់ថ្ងៃ។

អ្នកស្រី ចែ​ អូយ​ ជាប្រជាពលរដ្ឋ និងជាអាជីវកលក់នំចំណីនៅតំបន់នោះ ​បានលេីកឡេីងថា​ ជារៀងរាល់ថ្ងៃពួកគាត់ពិបាកក្នុងការរស់នៅណាស់​ ដែលទ្រាំហិតក្លិនទឹកស្អុយខ្មៅហូរចេញពីប្រព័ន្ធលូមិនដាច់​ មិនថាខែវស្សា​ ឬខែប្រាំង​។ ចំណែកការប្រកបរបរលក់ដូររបស់គាត់ក៏មិនសូវដាច់​ ដោយសារតែនៅមុខតូបរបស់គាត់ ពោពេញទៅដោយទឹកស្អុយកខ្វក់ហូរកាត់។

អ្នកស្រីបន្តថា​ កាលពីប្រហែលជាង៥ឆ្នាំមុន​ ពួកគាត់ជាប្រជាពលរដ្ឋបានស្នេីសុំទៅ​អនុ​ភូមិ​ មេភូមិទួលពង្រម្តងជាពីរដងមកហេីយ​ ហេីយអាជ្ញាធរក៏បានចុះពិនិត្យ​តែមិនមានដំណោះស្រាយនោះទេ។ បន្ទាប់មកខាងអាជ្ញាធរក៏បានប្រាប់ដល់ប្រជាពលរដ្ឋដែលរស់នៅតំបន់នោះ​ថា បេីចង់បាត់ទឹកដែលហៀរចេញពីប្រព័ន្ធលូ​ ទាល់តែរៃអង្គាសលុយម្នាក់បន្តិចមកដេីម្បីជួលរថយន្តមកបូមទឹកចេញពីលូ។

បើតាមអ្នកស្រី ទោះបីមិនបានស្ថាបនាជួសជុលផ្លូវឲ្យបានស្អាតក៏ដោយ តែសូមឲ្យអាជ្ញាធរជួយមានវិធានការរំដោះទឹកស្អុយនេះចេញកុំជះក្លិនដូចសព្វថ្ងៃ ដើម្បីបរិស្ថាន អនាម័យ និងសុខភាពពលរដ្ឋ។

ជុំវិញបញ្ហានេះ​ លោក​ ចេង​ ខន មេភូមិទួលពង្រ បានប្រាប់ កម្ពុជាថ្មី នៅរសៀលថ្ងៃទី១១​ ខែកុម្ភៈ​ ឆ្នាំ២០២៥នេះ​ថា លោកបានស្នេីទៅថ្នាក់លេីដែរ តែមិនទាន់មានលទ្ធភាពដេីម្បីដោះស្រាយ៕

អត្ថបទ៖ សុខា